ЗэIукIэгъу дыриIагъ
Адыгеим и ЛIышъхьэу КъумпIыл Мурат Росздравнадзорым Адыгэ РеспубликэмкIэ ичIыпIэ къулыкъу ипащэу Шымыгъэхъу Айтэч зэIукIэгъу дыриIагъ.
Iофтхьабзэм хэлэжьагъэх АР-м иминистрэхэм я Кабинет и Тхьаматэ игуадзэу, финансхэмкIэ иминистрэу Виктор Орловымрэ псауныгъэр къэухъумэгъэнымкIэ министрэу Мэрэтыкъо Рустемрэ.
«Псауныгъэм икъэухъумэнкIэ республикэ учреждениехэм мылъкоу къафэттIупщырэм илъэс къэс хэтэгъахъо, уахътэм диштэу медицинэ учреждениехэр тэгъэкIэжьых, джырэ оборудованиемрэ транспортымрэ къафэтэщэфы, кадрэ Iофхэм тадэлажьэ. Медицинэ фэIо-фашIэхэр нахьышIоу агъэцакIэ зэрэхъугъэр цIыфхэм зэхашIэным, фэгъэкIотэныгъэ зиIэхэм ящыкIэгъэ Iэзэгъу уцхэр игъом аIэкIэхьанхэм пае ащ фэдэ мылъкум шIуагъэу къытырэм гъунэ лъыфыгъэным мэхьанэшхо иI», — къыIуагъ АР-м и ЛIышъхьэ зэIукIэгъур къызэIуихызэ.
Росздравнадзорым Адыгэ РеспубликэмкIэ ичIыпIэ къулыкъу 2024-рэ илъэсым Iофэу ышIагъэм икIэуххэр Шымыгъэхъу Айтэч къызэфихьысыжьыгъэх. Илъэсым къыкIоцI къафэIорышIэрэ учреждении 9-мэ ащыIагъэх; шапхъэхэр аукъо зэрэмыхъущтымкIэ унэшъуи 123-рэ аштагъ.
Планым къыдыхэмылъытэгъэ уплъэкIун 57-рэ зэхащагъ. Ащ нэмыкIэу Iэзэгъу уцхэр зезыгъакIохэрэм гъогогъу 52-рэ уплъэкIунхэр гъэрекIо ащ ашIыгъ. Iэзэгъу уцхэм ядэгъугъэ уплъэкIугъэнымкIэ экспертизэ 564-рэ зэхащагъ, шапхъэхэм адимыштэу Iэзэгъу уци 2 къагъэхьазырыгъэу къыхагъэщыгъ. ГъогогъуитIумкIи заводыр ары хэукъоныгъэ зышIыгъагъэр, Iэзэгъу уц къэмлан 950-рэ агъэкIодыжьыгъ.
Къулыкъум анахьэу ынаIэ зытыригъэтыхэрэм ащыщ цIыф куп заулэмэ фэгъэкIотэныгъэ зыхэлъ уасэкIэ Iэзэгъу уцхэр аIэкIэгъэхьэгъэнхэр. ЦIыфхэм закъызэрэфагъэзэгъэ тхылъи 101-р зауплъэкIум, ахэм япроцент 97-мэ къагъэлъэгъуагъ Iофхэм язытет зэрэтэрэзыр. ЯщыкIэгъэ Iэзэгъу уцхэр къаIэкIэхьанхэмкIэ 2024-рэ илъэсым цIыфхэм яфитыныгъэхэр зэраукъуагъэр анахьэу зэпхыгъагъэр IэзапIэхэм, сымэджэщхэм яамбулаторнэ къулыкъу иIофшIэн щыкIагъэхэр зэрэфэхъугъа-гъэхэр ары. Тхьаусыхэ тхылъ пэпчъ зэхафыгъ, сымаджэхэм ящыкIэгъэ Iэзэгъу уцхэр аIэкIагъэхьагъэх.
Республикэм и ЛIышъхьэ зэIукIэгъум зэрэщыхигъэунэфыкIыгъэмкIэ, псауныгъэм икъэухъумэн епхыгъэ Iофыгъохэр линие занкIэм илъэхъан цIыфхэм къаIэтыгъагъэх. ЦIыфхэм къаIэтыгъэ Iофыгъохэр зэшIохыгъэнхэм пае АР-м псауныгъэр къэухъумэгъэнымкIэ и Министерствэ пшъэрылъ къыфашIыгъ Росздравнадзорым ичIыпIэ къулыкъу, шIокI зимыIэ медицинэ страхованиемкIэ чIыпIэ Фондым, страховать зязыгъэшIыгъэхэм гъусэныгъэ адыриIэнэу. Медицинэм щыкIагъэу иIэхэр дэгъэзыжьыгъэнхэм ыкIи унэшъо тэрэзхэр штэгъэнхэм пае Росздравнадзорым АР-мкIэ ичIыпIэ къулыкъурэ нэмыкI уплъэкIокIо къулыкъухэмрэ язэфэхьысыжьхэр агъэфедэнхэу пшъэрылъ афашIыгъ.
АР-м и ЛIышъхьэ ипресс-къулыкъу къытырэ
къэбархэмкIэ ЛIышэ Саныет.