Тхыгъэу къыхэтыутырэр къэзыгъэхьыгъэр Мыекъуапэ щы­псэоу, зыгъэпсэфыгъом тIысыжьыгъэ врачэу, IофшIэным иветеранэу, илъэс 87-рэ зы­ныбжь Берлизева Елена Евгений ыпхъур ары. Ипсауныгъэ къы­зэщыкъуагъэу Мыекъопэ ­къэлэ сымэджэщым зычIэфэм, ащ Iоф щызышIэхэрэр къызэрэпэгъокIыгъэхэм ар фэгъэхьыгъ.

Ныбжьэу сиIэм елъытыгъэу сипсауныгъэ изытет зэщыкъуагъэ. Мызэу-­мытIоу сымэджэщым сычIэгъолъхьанэу къысаIощтыгъ, ау ар згъэцакIэщтыгъэп. Нэужым лъыдэкIуаем сыкъызыреутым, Мыекъопэ къэлэ сымэджэщым гу-лъынтфэ узхэм зыщяIэзэхэрэ отделениеу хэтым сычIагъэгъолъхьагъ. Гъэлъэшыгъэ терапием ипалатэ сифагъ, ащ къыщысашIэфыгъэм ишIуагъэкIэ чэщыр гупсэфэу исхыгъ.
Сымэджэщым узекIуалIэкIэ апэ къыз­щыоплъыхэрэ отделением щыублагъэу псынкIэу, бырсыр пымылъэу къыщыспэгъокIыгъэх, яIофшIэн зэрэзэгъэфагъэм гу лъыстагъ. Санитаркэхэм къащыублагъэу врачхэм анэсыжьэу, шъхьадж иIоф ыгъэцакIэу, IэпэIэсэныгъэу ахэслъэгъуа­гъэм сигъэгушIуагъ, сафэрэзагъ. Мафэ къэс лъыр сIахыщтми, капельницэ сфа­гъэуцущтми, гум Iоф зэришIэрэр ауплъэ­кIущтми, лъыр зэрэдэкIуаерэр ашыщтми — япшъэрылъхэр дэгъоу, къабзэу агъэ­цакIэщтыгъэх.
СыкъычIатхыкIыжьын зэхъуми са­нитаркэ ныбжьыкIэу Ларисэ IэпыIэгъу къыс­фэхъузэ зысигъэфэпэжьыгъ, сы­мэджэщым сыкъызащэм сIыгъыгъэхэр ухъумапIэм къырихыжьхи, къыситыжьыгъэх, машинэу къыслъыкIуагъэм нэс сыкъыгъэкIотэжьыгъ.
IэпыIэгъу къызэрэсфэхъугъэхэм пае къысэIэзэгъэ врачэу Вера Евгений ыпхъум ыкIи отделением медицинэ IофышIэу щылажьэхэрэм зэкIэми сызэрафэразэр къыхэзгъэщы сшIоигъу.
Арэущтэу IофшIэныр зэрэзэхэщагъэр отделением ипащэ ыкIи сымэджэщым иврач шъхьаIэ яшIушIагъ. Ащ лъэшэу сигъэгушIуагъ.
Елена Берлизева.
къ. Мыекъуапэ.