IофшIэнхэр чанэу аублагъэх
Мы илъэсыр къызихьагъэм къыщыублагъэу лъэпкъ проектыкIэу «ЩыIэныгъэм пае инфраструктурэр» зыфиIорэм игъэцэкIэн епхыгъэ IофшIэнхэр чанэу зэшIуахых.
Нафэу зэрэщытымкIэ, ыпэкIэ агъэнэфэгъэгъэ лъэпкъ проектэу «ПсэупIэмрэ къэлэ щыIакIэмрэ» зыфиIорэм пыдзагъэу ар щыт. Урысыем и Президентэу Владимир Путиным игукъэкIы- кIэ 2019-рэ илъэсым къыщыублагъэу 2024-м нэс Урысыем кIуачIэ щызиIэгъэ проектым ипIалъэ лъагъэкIотагъ, нэмыкIыцIэ иIэу.
Лъэпкъ проектым ыцIэ нэмыкI хъугъэми, ипшъэрылъхэр къэнэжьых: тихэгъэгу икъалэхэмрэ ицIыф псэупIэхэмрэ адэсхэм ящыIакIэ нахь Iэрыфэгъу зэрэхъущтым тетэу общественнэ чIыпIэхэр ыкIи щагухэр нахь зэтегъэпсыхьэгъэнхэр ары.
АдыгеимкIэ лъэпкъ проектыкIэм ипхырыщын апэрэу зыщыфежьагъэхэр къалэу Мыекъуапэ, Мыекъопэ, Джэджэ ыкIи Теуцожь районхэм яадминистрациехэр ары. Мыхэм аукционхэр ащызэхащэх, подрядчикхэр агъэнэфагъэх, псэупIэ заулэми чIыпIэхэм язэтегъэпсыхьанкIэ IофшIэнхэр ащырагъэжьагъэх.
Адыгэкъалэ, Тэхъутэмыкъое, Красногвардейскэ, Кощхьэблэ ыкIи Шэуджэн районхэм афэгъэхьыгъэу къэпIон хъумэ, мы лъэхъаным ахэм проект-сметэ документациер ащагъэхьазыры, къэралыгъо экспертизэр ашIы, подрядчикхэр агъэнэфэнхэм пае зэнэкъокъур зылъэпсэ Iофтхьабзэхэр зэрахьэх. Адыгеим псэолъэшIынымкIэ и Министерствэ къызэритыгъэмкIэ, общественнэ чIыпIэхэм язэтегъэпсыхьанкIэ республикэм ипсэупIэхэм IофшIэнхэр защаухыщтхэр 2025-рэ илъэсым шышъхьэIу мазэм ыкIэхэм адэжь. Мы илъэсым лъэпкъ проектым ипхырыщынкIэ тиреспубликэ ахъщэу къыщыхагъэкIыгъэр сомэ миллион 353-рэ фэдиз мэхъу.
Лъэпкъ проектым ипхырыщын 2030-рэ илъэсым нэс Урысыем щызэшIуахынэу агъэнэфагъ. Арышъ, Адыгеим инэмыкI псэупIабэми яобщественнэ чIыпIэхэр зэтырагъэпсыхьанхэу амал яI, ахэм ащыпсэухэрэм нахь гуIэтыпIэ, нахь Iэрыфэгъу щыIакIэ яIэным ущыгугъын плъэкIыщт.