Урысыем щыпхыращырэ проектэу «Пенсием узэрэкIощтыр ыкIи ащ зызэрэфэбгъэхьазырыщтыр» зыфиIорэм Адыгэ Республикэм IофшIэнымкIэ ыкIи социальнэ хэхъоныгъэмкIэ и Министерствэ дэлажьэ. Ащ къыдыхэлъытагъэу къэбар порталэу «Адыгея – горы возможностей для пенсионеров» зыфиIорэр ыгъэпсыгъ.

Мыщ ипшъэрылъ шъхьаIэр цIыфыр ныбжь хэкIотагъэм зынэсыкIэ ифэшъошэ IэпыIэгъоу ыкIи фэIо-фашIэу рагъэгъотын фаехэм афэгъэхьыгъэ къэбарыр игъэкIотыгъэу алъыгъэIэсыгъэныр ары.
— Нэжъ-Iужъхэм апае дгъэпсыгъэ къэбарлъыгъэ­Iэс амалыр зыми фэмыдэу гъэшIэгъонэу хъугъэ. Къулыкъуи 10-мэ ыкIи ахэм япхыжьыгъэ IофшIапIэхэм агъэцэкIэрэ фэIо-фашIэхэр зэкIэ мыщ «зы шъхьангъупчъэ» шIыкIэм тетэу щыугъоигъэх. Ар бзитIукIэ тхыгъэ: урысыбзэр ыкIи адыгабзэр (тилъэпкъэгъоу зихэку къэзыгъэзэжьыгъэхэм агъэ­федэным пае), — хигъэунэфыкIыгъ АР-м Iоф­шIэнымкIэ ыкIи социальнэ хэхъоныгъэмкIэ иминистрэ игуадзэу Даур Руслъан.
Порталым псынкIэу ыкIи Iэрыфэгъоу ищыкIэгъэ къэбарыр зэкIэ ибгъотэщт. ТигущыIэгъу къызэрэхигъэ­щыгъэмкIэ, мэхьанэ зиIэ хъугъэ-шIагъэхэм афэгъэхьыгъэ Iофтхьабзэу республикэм щызэхащэхэрэм зыщагъэгъозэн алъэкIыщт, хэлэжьэнхэу шIоигъоныгъэ зиIэхэм нахь пасэу яуахътэ рахъухьан амал яIэщт.
Джащ фэд, шIэхэу пенсием кIонэу щытхэм пэшIорыгъэшъэу къаратыщтыр зыфэдизыр къалъытэн, ар афагъэпсынымкIэ документэу рахьылIэщтхэр зэрагъэшIэн, къякIущт IофшIапIэ къыщагъотын е гъэсэныгъэ тедзэ зыщызэрагъэгъотыщтым зыщагъэгъозэн алъэ­кIыщт.
Анахь зэлъашIэрэ едзыгъоу хэтхэр — «ЗекIоныр» ыкIи «Зыгъэпсэфыгъор». ЗекIо гъогухэм, Адыгеим ичIыпIэ дахэхэм афэгъэхьыгъэ къэбархэр мыщ рагъо­тэщтых.
Едзыгъоу «ГуфакIохэр» зыфиIорэр щыIэныгъэм чанэу хэлэжьэрэ пенсионерхэм атегъэпсыхьагъ. «Тыжьын гуфакIохэм» ясатырэ хэхьанхэшъ, IэпыIэгъу зищыкIагъэхэм арагъэгъотын, щызэдэгущыIэнхэ алъэкIыщт. ЦIыф гъэшIэгъонхэм аIукIэнхэ, обществэм чIыпIэ гъэ­нэфагъэ щаубытын амал гуфэкIо IофшIэным фэгъэ­хьыгъэ нэкIубгъом къареты.
Даур Руслъан къызэриIуагъэмкIэ, къэбарлъыгъэIэс порталым иоператорыр цIыфхэм ясоциальнэ фэIо-фашIэхэр зыгъэцэкIэрэ Зэхэубытэгъэ гупчэу къалэу Мыекъуапэ дэтыр ары. Ащ иIофышIэхэм тхьамафэ къэс зыныбжь хэкIотагъэхэм апае республикэм илъ къэбархэр аугъоихэшъ, къырагъахьэх ыкIи ахэм алъэп­лъэх. Непэ ехъулIэу нэбгырэ мини 3,5-мэ порталыр агъэфедэ.
— ТызэрегупшысэрэмкIэ, мы сайтым цIыфхэм тапэкIэ шIуагъэ нахь къафихьыщт. 2025-рэ илъэсым ищылэ мазэ къыщегъэжьагъэу лъэпкъ проектэу «Унагъом» къыдыхэлъытагъэу шъолъыр программэу «ГъэшIэ кIыхьэр ыкIи чаныр» зыфиIорэм ипхырыщын дэлажьэх. Нахьыжъхэм ягъашIэ хэгъэхъогъэным ар фэIорышIэщт, ащ пае ахэр физическэ культурэм ыкIи спортым, псауныгъэр гъэпытэгъэным, культурнэ-зыгъэпсэфын Iофтхьабзэхэм ахагъэлэжьэщтых. ТиIофшIэн кIэухэу фэхъунэу щытыр тыжьын ныбжьым итхэм ящыIэныгъэ чан нахь лъыгъэкIотэгъэныр, ящыIэкIэ-псэукIэ нахьышIу шIыгъэныр ары, — къы­хигъэщыгъ Даур Руслъан.