Iахьзэхэлъ обществэу «ТНС энерго Кубань» зыфиIорэм зыкъызэрафигъэзагъэм ипэгъокIэу следственнэ къулыкъухэм гъэIорышIэкIо компаниищмэ ялIыкIохэм уголовнэ Iофхэр къафызэIуахыгъэх.

ГъэIорышIэкIо компаниеу «Умный дом» зыфиIоу фэтэрыбэу зэхэт унэ 14-мэ яфэIо-фашIэхэр Тэхъу­тэмыкъое районым щызыгъэцакIэрэм мы аужырэ илъэсрэ ныкъорэм электроэнергие уасэу зигугъу къэтшIыгъэ Iахьзэхэлъ обществэм ритыгъэр сомэ миллиони 4,2-кIэ нахьыбэн фэягъ.
МыекъуапэкIи Iофхэм язытет джащ фэд. Пшъэ­дэкIыжьэу ыхьырэмкIэ гъунэпкъэ гъэнэфагъэ зиIэ обществэу «Наш город» зыфиIорэм псым, фабэм, электроэнергием атефэрэ уасэр икъоу ахэр къаIэкIэзыгъахьэхэрэм аритырэп. Зигугъу къэтшIыгъэ гъэIорышIэкIо компанием электроэнергиемкIэ чIыфэу телъыр миллиони 4,8-м къехъу. ГъэIорышIэкIо компаниеу «Домус» зыфиIоу Краснодар краимкIэ Динской районым щызэхэщагъэм цIыфхэм яахъщэу къыIэкIэхьагъэр зыдихьыгъэр следовательхэм зэхафыщт. Сыда пIомэ электроэнергием пае сомэ миллион 1,7-у цIыфхэм къатыгъэр энергиер къаIэкIэзыгъэхьэрэ компанием исчет рагъэхьагъэп.
Псыр, фабэр е электроэнергиер къаIэкIэзыгъа­хьэхэрэм апашъхьэ чIыфэшхо щызиIэхэм лицензиемкIэ шапхъэхэр лъэшэу зэраукъорэр къэIогъэн фае. Ахэм административнэ пшъэдэкIыжь арагъэхьын, фэтэрыбэу зэхэт унэм игъэIорышIэнкIэ лицензиер аIахын алъэкIыщт.
Iахьзэхэлъ обществэу «ТНС энерго Кубань» зыфиIорэр цIыфхэм къяджэ коммунальнэ фэIо-фашIэхэр зыгъэцэкIэщтхэр къыхахы зыхъукIэ сакъынхэу, ахэм чIыфэ ателъмэ сайтымкIэ зэрагъэшIэнэу.
Татьяна Шамарина.
Iахьзэхэлъ обществэу «ТНС энерго Кубань» ипресс-къулыкъу