Пифагор итеоремэ ежь иорэд зэриIэр шъошIа? Ащ изакъоп. Хьисап зыгъэпсэфыпIэу Мыекъуапэ дэтым исаугъэтхэм зэкIэми джы макъэ яI. «Гармония Математического парка» зыфиIорэ проектым ар къыдыхэлъытагъ.

Хьисап зыгъэпсэфыпIэр зигукъэкIхэм ащыщэу, шIэныгъэхэмкIэ Урысые академием хьисапымкIэ иинститутэу В. А. Стекловым ыцIэ зыхьырэм икъутамэ ипащэу, хьисапымкIэ Кавказ гупчэм ишIэныгъэ IофышIэ нахьыжъэу, дунэе мэхьанэ зиIэ тынэу Лилавати ыцIэ зыхьырэм изехьакIоу Николай Андре­евыр къызыхъугъэ мафэм ар ипэгъокI шIухьафтын хъугъэ.
Мэкъамэу саугъэт пэпчъ къекIущтыр къыхэзыхыгъэр мэкъэмэусэу Къэбэр­дэкъо Мурат. Фильмэ ыкIи спектаклэ 200-м нахьыбэм ащ мэкъамэхэр афитхыгъ. Мыекъуапэ къызеблагъэрэм, мызэу, мытIоу хьисап зыгъэпсэфыпIэм ар дахьэу хъугъэ. Шъхьадж къыдиштэщт мэкъамэр къыхихынымкIэ ащ ишIуагъэ къэкIуагъ.
«Гармония Математического парка» зыфиIорэ проектым илъэтегъэуцо Адыгэ республикэ естественнэ-хьисап еджа­пIэу зыгъэпсэфыпIэр зыщыгъэпсыгъэм щыкIуагъ. ЗекIо лъэхъаным иублэгъу тефэу ащ дэт саугъэтхэм QR-кодхэр апалъхьащтых. Арэу зыхъурэм, зыгъэ­псэфыпIэм дахьэрэ пэпчъ мэкъамэхэм ядэIун ылъэкIыщт.
Шъугу къэдгъэкIыжьын, хьисап зыгъэ­псэфыпIэр АР-м и ЛIышъхьэу КъумпIыл Мурат икIэщакIоу 2018-м агъэпсыгъ. УрысыемкIэ ащ фэдэ зиIэр Адыгэ Рес­публикэ закъор ары. Республикэм иестественнэ-хьисап еджапIэ, АКъУ-м хьисапымкIэ и Кавказ гупчэ ыкIи шIэныгъэхэмкIэ Урысые академием хьисапымкIэ иинститутэу В. А. Стекловым ыцIэ зыхьырэм язэхэт проектэу ар щыт. Ащ игъэпсын зигукъэкIыр Адыгэ къэралыгъо университетым иректорэу Мамый Даутэрэ шIэныгъэхэмкIэ Урысые академием хьисапымкIэ иинститутэу В. А. Стекловым ыцIэ зыхьырэм икъутамэ ипащэу Николай Андреевымрэ.