Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ иIофышIэхэм, Адыгеим хэгъэгу кIоцI IофхэмкIэ и Министерствэ экономическэ щынэгъончъагъэмкIэ ыкIи къолъхьэ тын-Iыхыным пэуцужьыгъэнымкIэ игъэIорышIапIэрэ Урысыем хэгъэгу кIоцI IофхэмкIэ и Министерствэ Кощхьэблэ районымкIэ иотделрэ яоперативникхэм ягъусэхэу Къэбэртэе-Бэлъкъарым щыщ, илъэс 50 зыныбжь хъулъфыгъэу хабзэр зыукъуагъэм игъогупэ пабзыкIыгъ.

Урысыем и Уголовнэ кодекс ия 171.3-рэ статья ия 2-рэ Iахь зигугъу къышIырэ бзэджэшIагъэ зэрихьагъэ­кIэ, лицензие имыIэу этил спирт хэбзэнчъэу зэригъэ­кIуагъэкIэ ащ егуцафэх.
ХэбзэухъумэкIо къулыкъухэм яIофышIэхэм зэра­гъэунэфыгъэмкIэ, 2024-рэ илъэсым итыгъэгъазэ лицензие зимыIэ хъулъфыгъэм къызIэкIигъэхьэгъэ этил спиртыр АдыгеимкIэ Кощхьэблэ районым ит базэм хэбзэнчъэу аригъэщагъ.
ХэбзэухъумэкIо къулыкъухэм яIофышIэхэу уплъэ­кIунхэр зэхэзыщагъэхэм автомобиль цистернэрэ литри 5 зэрыфэрэ бжъэ бэшэрэб 400-м ехъурэ къагъотыгъ, спирт литрэ мин 24-рэ фэдиз пстэумкIи ахэм арытыгъ.
Адыгэ Республикэм хэгъэгу кIоцI IофхэмкIэ и Министерствэ иэксперт-криминалистхэм къызэраIуагъэм­кIэ, этил спирт ахэм арытыгъэр. Специалистхэм къы­зэрэрадзагъэмкIэ, къаIахыгъэ шъон пытэм сомэ миллион 1,7-м ехъу ыуас.
Уголовнэ Iофэу къызэIуахыгъэм изэхэфын макIо, хэбзэнчъэу агъэзекIощтыгъэ шъон пытэр къыздикIыгъэр, зыIэкIагъахьэщтыгъэр, мы бзэджэшIагъэм епхыгъэ нэмыкI лъэныкъохэр агъэунэфых.