Къалэу Мурманскэ щыщ хъулъфыгъэу илъэс 43-рэ зыныбжьым иуголовнэ IофкIэ Тэхъутэмыкъое район хьыкумым унашъоу ыштагъэм цIыфхэр щагъэгъозагъэх.

Урысые Федерацием и Уголовнэ кодекс ия 30-рэ статья ия 3-рэ Iахь, ия 228.1-рэ статья ия 5-рэ Iахь, ия 210-рэ статья ия 2-рэ Iахь зигугъу къашIырэ бзэ­джэшIагъэхэр зэрихьагъэкIэ, Интернетыр къыз­фэзыгъэфедэщтыгъэ бзэджэшIэ купым хэтэу хэбзэнчъэу наркотикхэр аIэкIигъахьэщтыгъэкIэ ар агъэ-­
мысагъ.
Хьыкумым изэхэсыгъо къызэрэщызэхафыгъэмкIэ, ахъщэшхо къыгъэхъэн зэрилъэкIыщт шIыкIэр 2022-рэ илъэсым имэзае социальнэ хъытыумкIэ ащ къыфаIотагъ ыкIи адэлэжьэнэу къеуцолIагъ. ЫужкIэ интернет-мессенджерхэмкIэ бзэджэшIэ купым хэтхэм къы­зэрэраIорэм тетэу Урысыем икъалэхэм наркотикхэр ащызэрищэу ыублагъ.
Къалэу Краснодар имэшIокугъогу вокзал дэжь 2022-рэ илъэсым ишышъхьэIу мазэ Iутыгъэ автомобилэу ар зэрытIысхьагъэм ибагажник ычIэгъ шъэф гъэтIылъыпIэу иIэм наркотик грамм 500 зырыз къэзыщэчырэ пакет 60 щыгъэбылъыгъагъ. Ахэр шъэфэу чIыпIихмэ ащычIилъхьанэу щытыгъ. Ау ыпшъэ къыралъхьагъэр гъэцэкIэгъу имыфэзэ, 2022-рэ илъэсым шышъхьэIум и 7-м хэбзэухъумэкIо къулыкъухэм ар къаубытыгъ.
БзэджашIэм ыгъэгъуазэхэзэ, Шапсыгъэ псыIыгъыпIэм къыщычIахыгъэ Iалъмэкъ шIуцIэм N-метилэфедрон зыфаIорэм фэдэ наркотик зэрылъ пакети 6 къы­рагъотагъ.
Урысыем щынэгъончъэнымкIэ и Федеральнэ ­къулыкъу Адыгэ РеспубликэмкIэ и ГъэIорышIапIэрэ Урысыем хэгъэгу кIоцI IофхэмкIэ и Министерствэ АдыгеимкIэ и ГъэIорышIапIэу наркотикхэр зэрагъэзекIорэм гъунэ лъызыфырэмрэ къагъэхьазырыгъэ материалхэр IэубытыпIэ къызфишIыхэзэ, Адыгэ Рес­публикэм хэгъэгу кIоцI IофхэмкIэ и Министерствэ иследственнэ гъэIорышIапIэ уголовнэ Iофыр зэхи­фыгъ.
Илъэс 14-рэ хьапсым дэсынэу ыкIи сомэ мин 300 хъурэ тазыр ытыжьынэу хъулъфыгъэм тыралъхьагъ.
Хьыкумым унашъоу ыштагъэм джыри хэбзэ кIуачIэ иIэ хъугъэп.