Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ муниципальнэ образованиеу ­«Лъэустэнхьэблэ къэлэ псэупIэм» иадминистрацие ипащэ игуадзэщтыгъэ Цундышк Руслъан Хьисэ ыкъоу зиIэнатIэ хэбзэнчъэу къызфэзгъэфедагъэм уголовнэ Iоф къыфызэIуахыгъ.

Урысыем щынэгъончъэнымкIэ и Федеральнэ ­къулыкъу Адыгэ РеспубликэмкIэ и ГъэIорышIапIэ иIофышIэхэм зэрагъэунэфыгъэмкIэ, Краснодар щыщ Виктория Толстокоровам муниципальнэ образова­ниеу «Лъэустэнхьэблэ къэлэ псэупIэм» иадминистрацие 2023-рэ илъэсым ичъэпыогъу мазэ зыкъыфигъэзагъ, чIыгу Iахь гъэнэфагъэр ыщэфыжь зэрэшIоигъор ащ илъэIу тхылъ итхэгъагъ. Документхэу ащ къарихьылIагъэхэм амыгъэкощырэ мылъкумкIэ къэралыгъо реестрэ зыкIым къыхэтхыкIыгъэр ахэлъыгъ. ЧIыгу Iахьым унэ зэрэришIыхьагъэм фэгъэхьыгъэ къэбар нэпцIхэр ащ итхэгъагъэх. Урысые Федерацием чIыгухэмкIэ и Кодекс ия 39.3-рэ статья ия 2-рэ пункт ия 6-рэ подпункт диштэу псэуалъэ зэрыт чIыгу Iахьыр аукцион зэхамыщэу аращэ.
Р. Хь. Цундышкым псэуалъэ гори чIыгу Iахьым зэримытыр ышIэзэ, иполномочиехэм аригъэхъузэ, муниципальнэ образованиеу «Лъэустэнхьэблэ къэлэ псэупIэм» иадминистрацие къыфэгъэзэгъэ чIыгу Iахьыр лъэIу тхылъ къязыхьылIэгъэ бзылъфыгъэм рищагъ.
Р. Хь. Цундышкымрэ В. В. Толстокоровамрэ хабзэр зэраукъуагъэм къыхэкIэу муниципальнэ образованиеу «Лъэустэнхьэблэ къэлэ псэупIэм» иадминистрацие сомэ миллионрэ мини 115-рэ чIэнагъэу ышIыгъ.
Урысыем щынэгъончъэнымкIэ и Федеральнэ ­къулыкъу Адыгэ РеспубликэмкIэ и ГъэIорышIапIэ къы­IэкIигъэхьэгъэ материалхэр IэубытыпIэ къызыфишIыхэзэ, Урысыем и Следственнэ комитет АдыгеимкIэ иследственнэ гъэIорышIапIэ Урысые Федерацием и Уголовнэ кодекс ия 285-рэ статья иа 1-рэ Iахь, ия 33-рэ статья ия 5-рэ Iахь, ия 159-рэ статья ия 4-рэ Iахь адиштэу къыфызэIуахыгъэ уголовнэ Iофхэм ахэплъагъ.
Теуцожь район хьыкумым Р. Хь. Цундышкым илъэ­си 5 условнэу телъхьэгъэнэу унашъо ышIыгъ. ЧIыгу Iахьыр муниципальнэ мылъкум хагъэхьажьыгъ.
Хьыкумым иунашъо хэбзэ кIуачIэ иIэ хъугъэ.