Урысыем щынэгъончъэнымкIэ и Феде­ральнэ къулыкъу Адыгэ РеспубликэмкIэ и ГъэIорышIапIэ хабзэр зыукъогъэ нэбгыритIумэ — муниципальнэ образованиеу «Тэхъутэмыкъое районым» иадминистрацие ипащэ игуадзэщтыгъэу Абрэ Эдуардрэ мы районым инароднэ депутатхэм я Совет идепутатэу Наш Шыхьамрэ ягъогупэ пибзыкIыгъ.

Урысыем щынэгъончъэнымкIэ и Федеральнэ ­къулыкъу Адыгэ РеспубликэмкIэ и ГъэIорышIапIэ иIофышIэхэм зэрагъэунэфыгъэмкIэ, Абрэ Эдуард иIэпыIэгъукIэ муниципальнэ мылъкум хахьэщтыгъэ чIыгу Iахьэу квадрат метрэ 15000 хъурэр народнэ депутатхэм я Совет идепутатэу Ш. А. Нашым къы­ратыгъ.
ЧIыгу Iахьым игъэфедэнкIэ хабзэр укъуагъэ зэрэ­хъурэр ышIэзэ, Э. Б. Абрэм ащ ищэн къызэтыригъэу­цуагъэп. Хэукъоныгъэр зэриушъэфыгъэм къыхэкIэу муниципальнэ образованиеу «Тэхъутэмыкъое районым» иадминистрацие ипащэ чIыгу Iахьыр агъэфедэнэу ыпкIэ хэлъэу зэраритырэм ехьылIэгъэ унашъом кIэт­хэжьыгъ. Кадастрэ уасэу иIэмкIэ — сомэ мини 142-рэ 350-кIэ ар аращагъ, бэдзэр уасэр сомэ миллион 1,2-м къыщыкIэрэп.
Хабзэр зэраукъуагъэм къыхэкIэу муниципальнэ образованиеу «Тэхъутэмыкъое районым» иадминистрацие сомэ миллионым ехъу чIинагъ.
Урысыем щынэгъончъэнымкIэ и Федеральнэ ­къулыкъу Адыгэ РеспубликэмкIэ и ГъэIорышIапIэ къыIэкIигъэхьэгъэ материалхэр IэубытыпIэ къызыфишIыхэзэ, Урысыем и Следственнэ комитет Адыгэ РеспубликэмкIэ иследственнэ гъэIорышIапIэ Урысые Федерацием и Уголовнэ кодекс ия 159-рэ статья ия 3-рэ Iахь диштэу къызэIуахыгъэ уголовнэ Iофыр зэхифыгъ.
Урысыем и Уголовнэ кодекс ия 159-рэ статья ия 3-рэ Iахь диштэу Тэхъутэмыкъое район хьыкумым
Э. Б. Абрэм сомэ мин 25-рэ, Ш. А. Нашым сомэ мини 100 тазырэу атырилъхьагъ. ЧIыгу Iахьыр муниципальнэ мылъкум хагъэхьажьыгъ.
Хьыкумым иунашъо хэбзэ кIуачIэ иIэ хъугъэ.