Урысые Федерацием и Президентэу Владимир Путиным и Указэу тикъэралыгъо Хэгъэгу зэошхом ТекIоныгъэр къызыщыдихыгъэр илъэс 80 зыщыхъурэм ехъулIэу зэтыгъо ахъщэ ятыгъэным ехьылIагъэр Адыгеим щагъэцакIэу рагъэжьагъ.

Нэмыц-фашист техакIохэр Адыгеим зырафыжьыгъэхэр илъэс 82-рэ зэрэхъу­рэр непэ республикэм щыхагъэунэфыкIы. МэфэкIым игупчэ шъыпкъэ итхэр Хэ­гъэгу зэошхом иветеранхэу зипчъагъэ илъэс къэс нахь макIэ хъухэрэр ары. Джащ епхыгъэу ахэм анаIэ атегъэтыгъэным, афэгумэкIыгъэным мэхьанэшхо иI.
Сомэ мин 80 ахэм ятыгъэнэу Социальнэ фондым ыгъэнэфагъ. Хэгъэгу зэошхом сэкъатныгъэ хэзыхыгъэхэм, ахэм яшъхьэгъусэхэм, тамыгъэхэу «Блокадэ зашIым Ленинград дэсыгъ», «Къа­дзыхьэгъэ Севастополь дэсыгъ», «Къа­дзыхьэгъэ Сталинград дэсыгъ» зыфиIохэрэр къызыфагъэшъошагъэхэм, концлагерьхэм адэсыгъэхэу а лъэхъаным зыныбжь имыкъугъагъэхэм ар аратэу рагъэжьагъ. Ащ фэдэ нэбгырэ 68-рэ Адыгеим ис. Ащ нэмыкIэу, хабзэ зэрэ­хъу­гъэу, ТекIоныгъэм и Мафэ ехъулIэу Хэгъэгу зэошхом иветеранхэми, ахэм афагъадэхэрэми (ащ фэдэ нэбгырэ 700 фэдиз Адыгеим щэпсэу) республикэ ахъщэ IэпыIэгъур аратыщт.
— Лъыбэ зыщагъэчъэгъэ мыщ фэдэ зэо хьазабым ТекIоныгъэ къы­щытфыдэзыхыгъэхэр зэкIэ тэгъэлъапIэх, зэоуж илъэсхэм хэгъэгур зэтезгъэуцожьыгъэ пстэуми тафэраз. Тэ типшъэрылъыр тарихъ шIэжьыр къэтыухъумэныр, фашистхэм атекIогъэнымкIэ Урысыем мэхьанэу иIагъэм ехьылIэгъэ къэбар тэрэзыр къыткIэхъухьэрэ лIэужхэм аIэкIэдгъэхьаныр, ТекIоныгъэр къыдэзыхыгъэхэм афэдэу я Хэгъэгу шIу алъэгъоу, пытагъэ къыз­хагъафэу ныбжьыкIэхэр пIу­гъэнхэр ары, — къыIуагъ АР-м и ЛIышъхьэу КъумпIыл Мурат.