Я VIII-рэ Урысые зэнэкъокъоу къэлэ цIыкIухэм ащыпсэухэрэм щыIэкIэ Iэрыфэгъу яIэным фытегъэпсыхьэгъэ проект анахь дэгъухэм якъыхэхын къыдыхэлъытагъэу Мыекъуапэрэ Адыгэкъалэрэ япхыгъэ проектхэм ягъэцэкIэн зэрэкIорэм АР-м иминистрэхэм я Кабинет изэхэсыгъо щытегущыIагъэх. Адыгеим и ЛIышъхьэу КъумпIыл Мурат пшъэрылъ зэрэфишIыгъэм тетэу Iофтхабзэр зэрищагъ АР-м иминистрэхэм я Кабинет и Тхьаматэу КIэрэщэ Анзаур.

АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ иминистрэу Валерий Картамышевым къызэриIуагъэм­кIэ, 2024-рэ илъэсым шъолъырэу «Мэз­дахэм» изэтегъэпсыхьан ипроект къалэу Мыекъуапэ щагъэцэкIагъ. ПстэумкIи сомэ миллиони 174,2-рэ фэдиз ащ пэIухьагъ. А ахъщэмкIэ лъэсрыкIо ыкIи кушъхьэфэчъэ гъогу­хэр зэтырагъэпсыхьагъэх, архитектурэ теплъэ зиIэ пкъыгъо­хэр агъэуцугъэх, кIэлэцIыкIу ыкIи спорт чIыпIэхэр нахь дэгъоу агъэтэрэзыгъэх, чъыг-къэ­гъагъэхэр агъэтIысхьа­гъэх, урамхэр къэзгъэнэфыщтхэр, зэралъыплъэщтхэ камерэхэр агъэуцугъэх, зызщаплъыхьан алъэкIыщт чIыпIэхэри нахь зэтырагъэ­псыхьагъэх.
2024-рэ илъэсым Адыгэкъалэ дэт зыгъэпсэфыпIэ паркым изэтегъэпсы­хьанкIэ проектым ия 2-рэ чэзыу агъэцэкIагъ. Бюджет зэфэшъхьафхэм ыкIи бюджетым къыхимыубытэрэ къэкIуапIэхэм яшIуагъэкIэ сомэ миллион 84,5-рэ ащ пэIухьанэу къыхагъэкIыгъ. Проектым тегъэпсыхьагъэу лъэсгъогухэр зэтырагъэпсыхьагъэх, урамхэр къэнэфынхэу ашIыгъэх, архитектурэ пкъыгъо цIыкIухэр агъэуцугъэх, автомобиль кIуапIэхэр, кIэлэцIыкIу джэгупIэхэр зэтырагъэпсыхьагъэх, камерэхэр ыкIи макъэ къэзгъэIущт пкъыгъохэр агъэуцугъэх, чъыг-къэгъагъэхэр агъэтIысхьа­гъэх. Мы илъэсым гъэтхапэм ыкIэм нэсэу IофшIэнхэр аухын мурад яI.
Къэлэ щыIэкIэ Iэрыфэгъур гъэпсыгъэ­нымкIэ я IХ-рэ Урысые зэнэкъокъоу къэлэ проект анахь дэгъухэу 2025-рэ илъэсым шIомыкIыщт пIалъэ зиIэхэм азыфагу текIоныгъэр къыщыдэзыхыгъэ­хэр «Мэздахэ» дэжь щыIэ хыкъумхэм язэтегъэпсыхьан епхыгъэ проектымрэ Адыгэкъалэ дэт зыгъэпсэфыпIэм изэтегъэпсыхьанкIэ ящэнэрэ чэзыум епхыгъэ проектымрэ арых.
Мэздахэ изэтегъэпсыхьан сомэ миллиони 175-рэ пэIуагъэхьащт. Мы илъэсым псыутIэхэм янэпкъхэм язэтегъэпсыхьан, архитектурэ пкъыгъо цIыкIухэм ягъэуцун, чъыг-къэгъагъэхэм ягъэтIысхьан ыкIи урамхэм якъэгъэнэфын япхыгъэ IофшIэнхэр зэшIуахынхэу агъэнэфагъ.
Адыгэкъалэ изыгъэпсэфыпIэ парк игупчэ гъогу архитектурэ псэолъэ цIыкIухэр щагъэуцущтых, чъыг-къэгъагъэхэр щагъэтIысхьащтых, кIэлэцIыкIу ыкIи спорт чIыпIэхэр щагъэпсыщтых. Проектым сомэ миллион 82,6-рэ пэIухьащт.
«ЗыгъэпсэфыпIэ чIыпIэу «Мэзда­хэрэ» Адыгэкъалэ щызэтырагъэпсы­хьажьырэ паркымрэ цIыфхэр нахьыбэу якIуалIэхэ хъугъэ. Республикэм и ЛIышъхьэ пшъэ­рылъ къытфишIыгъ бизнесым тыригъусэу а чIыпIэхэр амал зэриIэкIэ нахь Iэрыфэгъухэу, нахь узыIэпащэхэу хъунхэм пае, хьакIэхэми, ежь республикэм щыпсэу­хэрэми агу къэзыIэтыщтхэр икъоу къыдэтлъытэнхэу», — къыхигъэщыгъ КIэрэщэ Анзаур.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.