Ом изытет гъогурыкIоныр къегъэхьылъэми, «ЭкоЦентрэм» къызэритырэмкIэ, пыдзафэхэр зыугъоирэ машинэхэм яIофшIэн зэпагъэущтэп. Ау гъогухэр зэраукъэбзыхэрэм елъытыгъэу хэкIитэкъупIэхэм якIолIэнхэр зыщафэкъиныщт чIыпIэхэр къыхэкIынхэ ылъэкIыщт.

Урам шъхьаIэхэр аукъэбзых нахь мышIэми, гъогу къохьапIэхэм осыр ащызэтеусэягъ. «ЭкоЦентрэм» къызэритырэмкIэ, ащ къыхэкIэу пыдзафэхэм ядэщын чIыпIэхэм щагъэгужъон ылъэ­кIыщт.
ЧIыпIэ зыгъэIорышIэжьыпIэхэм макъэ арагъэIузэ пыдзафэхэр дэзыщыщт машинэхэр зырыкIошъущтхэ гъогухэр къы­хагъэщых. Осыр зыщыIуатхъугъэхэр ыпэ рагъэшъых, пыдзафэхэр ащаугъоих. Обществэу «ЭкоЦентрэм» и Адыгэ къу­тамэ ипащэу Алыбэрд Налбый къызэриIуагъэмкIэ, пыдзафэхэр зыщыдащырэ уахътэри зэблахъугъ.
«Район администрациехэми зэпхыныгъэ адытиI, ахэм тынаIэ атет. ЕкIолIапIэ зыфашIыгъэ чIыпIэхэр апэ итэгъэшъых. Гъогухэр зыщаукъэбзыхэрэм машинэхэр елбэтэу дгъэкIонхэм тыфэхьазыр», — къыIуагъ Алыбэрд Налбый.
ХэкIитэкъупIэхэр осым хэщтыхьагъэхэ хъумэ, IофшIэныр къегъэхьылъэ. Мэхьанэ зиIэр гъогухэр зэраукъэбзыгъэхэм тетэу макъэ къарагъэIуныр ары. Телефонэу цIыфхэр къызытеощтхэр: 8 800 707 05 08. Гъогухэм ягъэкъэбзэн зипшъэрылъхэр чIыпIэ администрациехэмрэ унэхэм язытет зынаIэ тезыгъэтырэ гъэIорышIэкIо компаниехэмрэ.
Джащ фэдэу «ЭкоЦентрэм» иIофы­шIэхэм цIыфхэм анаIэ тырарагъадзэ пыдзафэхэр зыщаугъоирэ контейнерхэр зыдэщыIэ чIыпIэхэм яавтомобильхэр ащамыгъэуцунхэу, хэушъхьафыкIыгъэ техникэр екIолIэн алъэкIыным пае. Осыр къызщесырэм пыдзафэхэм ядэщын зэрэгужъон ылъэкIыщтыр къыдалъытэзэ ашIынэу. Ом изытет къызщызэщыкъорэм а Iофыгъохэм язэшIохын нахь охътабэ ехьы.

«ЭкоЦентрэм» и Адыгэ къутамэ ипресс-къулыкъу.
Сурэтыр: «ЭкоЦентрэр»