ВолейболымкIэ зэнэкъокъоу «Адыгэ Республикэм иныбжьыкIэхэм я Кубок» зыфиIорэр Адыгэ къэралыгъо университетым щыкIуагъ. Илъэс 16-м щегъэжьагъэу 35-м нэс зыныбжьхэр ащ хэлэжьагъэх, зэкIэмкIи командэ 18-мэ заушэтыгъ.

Хъулъфыгъэхэр пштэмэ, командэ 12 зэнэкъокъугъ. ТекIоныгъэр къыдэзыхыгъэр «Динамо- МГТУ-м» хэтхэр зыхэхьэгъэхэ «МГТУ Горизонт» зыфиIорэр ары. Ау мыщ иволейболистхэм псын­кIэ къащыхъугъэп финал ешIэ­гъур. Ахэр спорт еджапIэу С.М. Джэнчатэм ыцIэ зыхьырэм зыщызыгъасэхэу 2009-рэ илъэсым къэхъу­гъэхэм аIукIагъэх. ЕшIэгъур 2:1-у аухыгъ. Ящэнэрэ чIыпIэр къэлэ спорт еджапIэу «Юность» зыфиIорэм икомандэ фагъэшъошагъ.
Пшъашъэхэр команди 6 хъущтыгъэх. Апэрэ едзыгъом ахэр купитIоу агощыгъэх, нэужым анахь лъэшхэр текIоныгъэм фэбэнагъэх. Финалым «МГГТК ФК и ЧС» зыфиIорэр спорт еджапIэу С.М. Джэнчатэм ыцIэ зыхьырэм щыIукIагъ ыкIи текIоныгъэр къыдихыгъ. Командэу «АГУ плюс» зыфиIорэр ящэнэрэ хъугъэ.
Командэхэм ахэтхэм текIоныгъэр ыкIи хагъэунэфыкIырэ чIыпIэхэр къызэрэдахыгъэхэр къэзыушыхьатырэ дипломхэр, медальхэр ыкIи турнирым ипартнерхэм япродукциехэр афагъэшъошагъэх.
Iофтхьабзэм кIэщакIо фэхъугъэх Адыгеим ныбжьыкIэ IофхэмкIэ и Комитет, АР-м физическэ культурэмкIэ ыкIи спортымкIэ и Комитет, Адыгэ къэралыгъо университетыр ыкIи общественнэ организациеу «Урысыем иныбжьыкIэхэм ясоюз».