ХагъэунэфыкIырэ чIыпIитф

ДзюдомкIэ Къыблэ федеральнэ шъолъырым ипервенствэу Мыекъуапэ щыкIуагъэм Адыгеим испортсменхэм медалитф къыщахьыгъ. Зыныбжь илъэс 23-м шIомыкIыгъэхэр ары зэнэкъокъугъэхэр. Урысыем и Къыблэ ишъолъыри 9-мэ ялIыкIо 206-мэ заушэтыгъ.
Краснодар краим икомандэ спортсмен 81-рэ хэхьагъ, Адыгеир нэбгырэ 16-мэ (кIэли 10-мэ ыкIи пшъэшъи 6-мэ) къагъэлъэгъуагъ.
Республикэм илIыкIоу Татьяна Шаталовар килограмм 57-м нэс къэзыщэчыхэрэм якуп щыбэнагъ ыкIи текIоныгъэр къыдихыгъ. Милана Дзагаловам ятIонэрэ чIыпIэр къыфагъэшъошагъ, Камила Дзагаловар ящэнэрэ хъугъэ. Пшъашъэхэр зыгъасэхэрэр Нэпсэу Бислъан. Джащ фэдэу Наш Расулрэ Дзыбэ Алыйрэ джэрз медальхэр къахьыгъэх.
Къэралыгъом ипервенствэ и Урысые едзыгъо мэлылъфэгъум Волгоград щыкIощт.