Пэнэшъу Аминэт 1969-рэ илъэсым къыщегъэ­жьагъэу 2017-рэ илъэсым нэс хьалэлэу тигъэзет щылэжьагъ, тхьамафэм тфэ ар къыдэкIыным иIахьышIу хишIыхьагъ. «Адыгэ ма­къэм» Iутхэр ягуапэу Аминэт фэгушIох ныбжь дахэ иIэ зэрэхъугъэмкIэ ыкIи шIоу щыIэр къыдэхъу­нэу фэлъаIох.

1984-рэ илъэсым гъэзетэу «Социа­листическэ Адыгеим» корректорэу Iоф сшIэнэу сыкъызыIохьэм, машинисткэу ащ Iутыгъэ Пэнэшъу Аминэт нэIуасэ сыфэхъугъ. Илъэси 5 — 6 тешIи, зэдзэкIынымкIэ отделым сы­къызащэжьым, нахьыбэрэмкIэ ма­шинисткэхэр ары кIуапIэу тиIагъэр, щэджэгъуашхи бэрэ зэдэтшIэу хъущтыгъэ. Пщынэ Iапэм ехьыщырхэм атеохэзэ псынкIэу ахэм зэрэхаутырэр, къэIогъу тимыфэзэ гущыIэхэр тхьапэм къызэрэтехьэрэр лъэшэу згъэшIагъощтыгъ. Пшысэ горэм сы­хэфагъэу къысщыхъоу, яIофшIакIэ сиумэхъыгъэу ахэм аIапэ зэрэзечъэ­рэм бэрэ сылъыплъэщтыгъ.
ХэутэкIо бзылъфыгъищмэ ащыщэу сыгу нахь зыпэблагъэ хъугъэр Аминэт ары. Бэслъыныябзэ ащ зэрэIулъым, къэбэртэе къуаджэ сэ сыкъызэрэдэ­хъухьагъэм ар япхыгъэу, цIыфыгъэу хэлъымкIи сызфикъудыигъэу къысшIошIы. ИбэрэчэтыгъэкIи, игупцIэнагъэкIи, ихьалэлыгъэкIи, ищыгъу-­пIастэ зэрэтIупщыгъэмкIи, Iэдэбэу хэлъымкIи уахигъэлъыхъухьанэу щыт зыфаIохэрэм афэд Аминэт. Сызы­гъэгумэкIырэ Iофхэм ашъхьэ сшыпхъу нахьыжъым фэдэу ащ фисхыщтыгъ. Шъэбагъэрэ Iушыгъэрэ къызычIэщырэ нэхэмкIэ Аминэт гуфаплъэу къы­сэплъызэ упчIэжьэгъу къысфэхъущтыгъ. Гъэзетым зыIумытыжьыр тIэкIу шIагъэми, игъэсэпэтхыдэхэр джыри стхьакIумэ зэритых.
ИщыIэныгъэ изы Iахьышхоу ылъы­тэщтыгъэ лъэпкъ гъэзетым Аминэт ыгуи ыпси етыгъэу илъэс 48-рэ щы­лэжьагъ. Унагъо зыпылъ бзылъ­фыгъэмкIэ ар Iоф псынкIэгъуагъэп. Сыда пIомэ официальнэ материалхэр гужъуагъэу загъорэ гъэзетым къагъэхьыщтыгъэх, ахэр зыхиутыжьыхэ нэуж чэщыр хэкIотагъэу иунагъо ихьажьын фаеу хъущтыгъ. Ау ащ пае ар гъумы-тIымыгъэу, ибын-унагъо зыгорэм фыщигъэкIагъэу зэхэсхы­гъэп. Ишъхьэгъусэу Пэнэшъу Хьазрэтрэ ежьыррэ зэдагъотыгъэ кIэлитIур дахэу зэдапIугъ, алъэ тырагъэуцуагъ.
Аминэт, уимэфэкI мафэкIэ сыпфэгушIо! БгъэшIагъэр дышъэ бгъэрылъхьэу, джыри къэбгъэшIэщтыр насып лъэпэфэу, уибын щыщ пстэуми яфабэ оркIэ мыкIуасэу, уиIахьыл-лыщыщ­хэм ятхъагъо уищыIэныгъэ ипIэшъхьагъ шъабэу тичIыгу бэрэ утетынэу, жъышъхьэ мафэ ухъунэу сыпфэлъаIо.
ЛIышэ Санет.

Ане иIофшIакIэ, ишэн-зекIуакIэхэм нахь ащыгъуазэ сызыхъугъэр кор­ректор IофшIэным ыуж отделым сызащэжьыр, ситхыгъэхэр компьютерымкIэ хиутыхэ зэхъур ары. Арэу щытми, мафэ къэс узэрихьылIэрэ цIыфыр зыфэдэр къыбгурыIон плъэ­кIыным фэдиз уахътэм Iоф зэдэтшIагъ.
Пстэуми апэ къыхэзгъэщы сшIоигъор Ане «бзылъфыгъэ шъыпкъ» зыфатIорэ гущыIэхэр зэрепэсыгъэхэр ары. Непэ къызынэсыгъэми арэущтэу ащ сеплъы. Сыд фэдэрэ лъэныкъо-
кIи IэпкIэ-лъапкIэу зэрэщытыгъэм, джыри ащ зэрэтетым дакIоу иунагъокIэ, илъфыгъэхэмкIэ, игупсэхэмкIэ зэрэпсэемыблэжьыр сыдигъуи къы­хэщыщтыгъ, зэкIэми атеубгъуагъэм фэдагъ.
Илъэс пчъагъэу Iоф зызэдэтшIа­гъэм шэн дэгъоу, анахь уасэ зыфэсшIэу Ане хэслъэгъуагъэр, бэмэ ар яплъэгъулIэрэп, цIыфэу ыгу зыфэ­щагъэм сыдигъуи фэшъыпкъэн, ыгъэ­ныбджэгъун, ихъяри, икъини диIэтын зэрилъэкIырэр, фишIэшъущтымкIэ къогъанэ имыIэу зэрэпсэурэр ары. Шъыпкъагъэ хэлъ, нэфаIоу щыт, уакIыбкIэ къыптемыгущыIэн цIыфэу ары зэрэтшIэрэр.
ИмэфэкI мафэкIэ Ане сыфэлъаIо сшIоигъу псауныгъэ иIэнэу, шIу ылъэ­гъухэрэм яхъяр адигощэу илъэсыбэрэ ахэтынэу, къиным къыщиухьэу илъфыгъэхэм, ахэм къакIэхъухьа­гъэхэм ашъхьагъ итынэу.
ЖакIэмыкъо Аминэт.

Гъэзетым сыщылэжьэнэу сыкъызыIохьэм, Iоф зыдэсшIэнэу сыкъыз­хэхьэгъагъэхэр къысфэчэфхэу, сымы­шIэрэмкIэ сяупчIыми, гурыIогъошIоу зэкIэри къысфаIуатэщтыгъ. НэшIу­кIэ пстэуми сяплъыгъагъ цIыфыгъэу ахэлъыгъэм пае. ЗэкIэри зы унагъо къикIыгъэхэм фэдэу, зэфэ­чэфхэу пчэ­дыжьым IофшIэгъу мафэр рагъа­жьэщтыгъ. ЯзэхэтыкIэ сшIогъэшIэгъонэу салъыплъэщтыгъ. Гу­хэкI нахь мышIэми, бэмэ ядунай ахъо­жьыгъ, Тхьэм джэнэт лъапIэр къарет.
Iоф къыддэзышIэщтыгъэ Пэнэшъу Аминэт гущыIэ фэбэ заулэкIэ игугъу къэсшIы сшIоигъу. Шъырытэу, Iэдэбышхо хэлъэу, Iуи-шIи пымылъэу иIофшIэн дэгъоу ыгъэцакIэщтыгъ. А лъэхъаным пчыхьэрэ бэрэ тычIэсэу хъущтыгъэ. Тинахьыжъхэм ащыщэу Iоф къыддэзышIэщтыгъэхэр зыгорэм фаехэу, щэлэмэ-хьалыжъоми, псы IэшIуми, квасми Аминэт къызелъэIу­хэкIэ, зи химыIухьэу тучаным кIоти, къафихьыщтыгъ. Бэрэ игугъу тэшIы «Аминэт ыIощтыгъэхэр, ышIэщтыгъэхэр» тIозэ.
Унэгъо дахи иI: икIэлитIу къате­кIыгъэхэм атеубгъуагъэу, афишIэщтымрэ зэригъэгушIощтхэмрэкIэ зышъхьамысыжьэу икъорэлъф цIыкIухэр егъэгушIох. Аминэт къы­зы­хъугъэ мафэр, ныбжь дахэ иIэ ­
зэрэ­­хъугъэр хигъэунэфыкIыщтышъ, псау­ныгъэ пытэм щымыкIэу, щыIэ­кIэ-псэукIэ дэгъу иIэу, ибын-унагъо датхъэу, къыкIэхъухьагъэхэм агъэгу­шIоу, алъытэу бэрэ щыIэнэу сыфэ­лъаIо!
Нэфышъ Свет.

СицIыкIугъом щегъэжьагъэу Пэ­нэшъу Аминэт сэшIэ. Арырэ сянэу Къазый Цуцэрэ ящыгъу-пIастэ зэхэлъэу, зэгурыIохэу илъэсыбэрэ тигъэзет щызэдэлэжьагъэх. Сэри синасып къыхьыгъ зы кабинет сыдисэу илъэс 20-м ехъу Аминэт Iоф дэсшIэнэу. ИцIыф гъэпсыкIи, иунэгъо кIоцI илъ хабзэхэми дэгъоу сащыгъуаз. Бысым­гощэ бэрэчэтэу зэрэщытым имы­закъоу, шIум ренэу щыгугъырэ цIыф гупсэфэу, тынчыгъо зэбгъотылIэрэ бзылъфыгъэу ар щыт. IофшIэным е нэмыкI лъэныкъохэм япхыгъэ Iофыгъо горэкIэ зыфэзгъэзагъэу джэуапэгъу къысфэмыхъоу, сызэрэзекIощт шIыкIэр къысимыIоу къыхэкIыгъэп.
IэпэIэсэныгъэшхо зыхэлъ машинисткэу, операторэу Ане щытыгъ, зыфагъэзэрэ Iофыр сыдигъуи гуетыныгъэ хэлъэу ыгъэцакIэщтыгъ. Гъэзетым щыдэлэжьагъэхэм джы къыз­нэсыгъэми мы бзылъфыгъэ нэгушIом шIукIэ игугъу ашIы. ЗишIуагъэ зэригъэкIыгъэ ныбжьыкIэхэри ащ къы­фэразэх, лъытэныгъэ фашIы.
Аня, уимэфэкIкIэ сыпфэгушIо, ­уипсауныгъэ къыкIимычэу, уигугъэрэ уигъашIэрэ зэтефэу бэрэ ущыIэнэу, уиIахьыл-лыщыщхэм яхъяр адэплъэгъунэу, уикъорэлъфхэм ягъэхъагъэхэмкIэ уагъэгушIо зэпытынэу пфэсэIо!
Сетэ ФатIимэт.
Сурэтхэр: унагъом ихъарзынэщ.