Шъолъыр гъэсэныгъэ проектэу «Адыгеим илIыхъужъхэр» зыфиIорэм фэгъэхьы­гъэ зэIукIэ фондэу
«Хэгъэгум иухъумакIохэр» зыфиIорэм щыкIуагъ.

ДзэкIолIхэм, зэо зэпэуцужьхэм яветеранхэм проектыр ателъытагъ. «Тилъэ­хъан илIыхъужъхэр» зыфиIорэ программэм иIофшIэн ыублэщт. Ащ имэхьанэ, шап­хъэу пылъхэр, хэлэжьэн зы­лъэкIыщтхэр зэхахьэм къыщаIотагъ.
ЗэIукIэгъур пэублэ пса­лъэ­кIэ къызэIуихыгъ АР-м чIы­пIэ зыгъэIорышIэжьынымкIэ къулыкъухэм адэлажьэрэм и Комитет итхьаматэу КIэдыкIое Руслъан.

— Урысые дзэкIолIхэу ти­къэралыгъо къэзыухъумэхэрэм лIыхъужъныгъэу, лIыгъэу зэрахьэрэм тырэгушхо. Непэ дзэкIолIхэу зичIыпIэ къэзгъэзэжьыгъэхэм амалышIухэр ятыгъэнхэм мы программэр фэ­IорышIэ. Фронтым къикIы­жьыгъэхэм щыIэныгъэм зы­къызэрэхагъотэжьыщтым фы­тегъэпсыхьагъ муниципальнэ гъэIорышIэным ылъэныкъокIэ сэнэхьатхэм зыщахагъэхъорэ курсым изэхэщэн, — къыIуагъ КIэдыкIое Руслъан.
Егъэджэнхэр илъэсым къыкIоцI кIощтых. УпчIэ зиIэхэм джэуапхэр аратыжьыгъэх.
АР-м и ЛIышъхьэрэ минист­рэхэм я Кабинетрэ я Адми­нистрацие ипащэу Владимир Свеженец зэIукIэм къыщыгущыIагъ. Проектым имэхьанэ, тидзэкIолIхэм лIыхъужъныгъэу зэрахьэрэм, непэ сэнэхьатыкIэу зэрагъэгъотын алъэкIыщтхэм ар кIэкIэу къатегущыIагъ.
Хэбзэгъэуцухэм ацIэкIэ къэзэрэугъоигъэхэм закъыфигъэзагъ АР-м и Къэралыгъо Совет — Хасэм и Тхьаматэ игуа­дзэу, Урысыем и ЛIыхъужъэу Цэй Эдуард. Мы проектыр щы­Iэныгъэм щыпхыращыным мэхьанэшхо зэриIэр ащ хигъэу­нэфыкIыгъ.
Iофтхьабзэм хэлэжьагъэх хэбзэ къулыкъухэм, патриотическэ ыкIи общественнэ организациехэм ялIыкIохэр, нэ­мыкIхэри.
ЛIыхъужъхэр зыгъэгумэкIырэ Iофыгъохэм язэхэфынкIэ мыщ фэдэ зэIукIэхэм яшIогъэшхо къэкIо.
Лъэпшъыкъо
Фатим.