Республикэм икъэбарлъы­гъэIэс амалхэм яIофышIэ­хэу ыкIи тхылъ къыдэгъэ­кIыным Iоф дэзышIэхэу зи­лэжьакIэкIэ къахэщыгъэхэр АР-м лъэпкъ IофхэмкIэ, Iэ­кIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет щагъэшIуагъэх.

Ащ итхьаматэу Шъхьэлэхъо Аскэр къэ­зэрэугъоигъэхэм «тхьашъуегъэпсэу» къариIуагъ, анахьэу анаIэ зытырадзэн фэе лъэныкъохэм шъхьафэу къащыуцугъ.
— БлэкIыгъэ илъэсым пшъэрылъэу ти­Iагъэхэр 2025-ми къэнэжьых, анахь шъхьа­Iэр хэушъхьафыкIыгъэ дзэ операциер ары. Зыпсэ емыблэжьэу пыим пэуцужьыхэрэм якъэбар шъуIотэн, шъуафэтхэн, цIыфхэм зэлъяжъугъэшIэн фае. Шъугу къэзгъэкIы­жьын, мыгъэ Хэгъэгум иухъумакIо и Илъэс. Арышъ, ащ фэгъэхьыгъэ Iофтхьабзэхэр бэу зэхэтщэщтых. Ау ащ изакъоп, респуб­ликэм щыхъурэ-щышIэрэм зэкIэми къэбар­лъыгъэIэс амалхэм ягугъу ашIын фае. Iофхэм язытет ишъыпкъагъэ шъоры зы­Iуатэрэр, — къыIуагъ Шъхьэлэхъо Аскэр.
Джащ фэдэу зэIукIэгъум зигугъу къыщашIыгъэхэм ащыщ республикэм икъэбарлъыгъэIэс амалхэм ялэжьапкIэ. АР-м и ЛIышъхьэ илъэсыкIэм ипэублэ ышIыгъэ унашъом тетэу, зилэжьапкIэ шъолъыр къэгъэлъэгъонхэм анэмысэу алъытэгъэ редакциехэм процентипшIым къыще­гъэжьагъэу тIокIитIум кIахьэу афыха­гъэхъощт. Зыхэм мы мафэхэм, адырэхэм гъэтхапэм и 1-м къыщегъэжьагъэу ахэр къаIукIэщтых.
— ЗилэжьапкIэ цIыкIухэм шIокI имыIэу гъэтхапэм 1-м къыщегъэжьагъэу афы­хэдгъэхъонэу АР-м и ЛIышъхьэ къытфигъэпытагъ. МыщкIэ республикэм гурыт къэгъэлъэгъонэу иIэхэм акIэдгъэхьанэу унашъо ышIыгъ, — къыIуагъ Комитетым итхьаматэ.
Нэужым щытхъу тхылъхэр къэзылэ­жьыгъэхэм афэгушIуагъэх ыкIи ахэр аратыжьыгъэх, зэкIэмкIи нэбгырэ 17-мэ. Къыхагъэщыгъэхэм ащыщ лъэпкъ гъэзетэу «Адыгэ макъэм» икорреспондентэу Анцокъо Иринэ.
Бжыхьэкъо Бэл.