Адыгэ Республикэм и Об­щественнэ палатэ 2024-рэ илъэсым Iофэу ышIагъэр зыщызэфахьы­сыжьыгъэ зэхэсыгъо иIагъ. Iофтхьабзэм пэ­щэныгъэ дызэрихьагъ ащ итхьаматэу Устэ Руслъан.

Зэхэсыгъом хэлэжьагъэх АР-м и ЛIышъхьэрэ иминистрэхэм я Кабинетрэ я Администрацие ипащэу Владимир Свеженец, АР-м и Къэралыгъо Совет — Хасэм и Тхьаматэу Владимир Нарожнэр, Урысыем IофшIэнымкIэ и ЛIы­хъужъэу, УФ-м и Общественнэ палатэ хэтэу, Адыгеим, Къэбэртэе-Бэлъкъарым, Къэрэщэе-Черкесым янароднэ тхакIоу МэщбэшIэ Исхьакъ, Адыгеим инахьыжъхэм я Совет итхьаматэу ГъукIэлI Нурбый, Общественнэ палатэм хэтхэр, нэмыкI­хэри.
АР-м и ЛIышъхьэу КъумпIыл Мурат ыцIэкIэ зэхэсыгъом хэлажьэхэрэм шIу­фэс гущыIэхэмкIэ закъыфигъэзагъ Владимир Свеженец. Республикэм ипащэ мы Iофтхьабзэм хэлэжьэнэу мыхъугъэми, Адыгэ Республикэм и Общественнэ палатэ IофшIэнэу ыгъэцакIэрэм осэшIу къызэрэфишIыгъэр ащ къыIуагъ. Сыд фэдэрэ Iофыгъоу палатэм къыIэтыхэрэм язэшIохын ЛIышъхьэм ынаIэ зэрэтыригъэтырэр, непэрэ Iофтхьабзэм зыщытегущыIагъэхэри зэрэлъагъэIэсыщтхэр ащ къыхигъэщыгъ. ТапэкIи зэкъотхэу язэ­дэлэжьэныгъэ лъагъэкIотэнэу къафэ­лъэIуагъ.
Лъэныкъо шъхьаIэу В. Свеженец къы­хигъэщыгъэхэм ащыщ лъэпкъ проектхэм япхырыщын. Шэпхъэ лъагэхэм атетэу къэралыгъо программэхэр гъэцэкIагъэхэ зыхъукIэ шъолъырым исоциальнэ лъэны­къо ыкIи иэкономикэ, цIыфхэм ящы­IэкIэ-псэукIэ зыкъаIэтыщт.
«Хэбзэ къулыкъухэмрэ общест­веннэ IофышIэхэмрэ дэгъоу зэрэ­зэдэлажьэ­хэрэм ишIуагъэкIэ эко­номикэми, социальнэ лъэныкъоми зэхъокIыныгъэшIухэр афэхъух, чIыпIэхэм язэтегъэпсыхьанкIэ ыкIи нэмыкIыбэхэмкIэ анахь къекIущт хэкIыпIэхэр къагъотын алъэкIы», — къыIуагъ В. Свеженец.
Владимир Нарожнэм къыхигъэщыгъ цIыфхэр ыкIи ахэм язэхахьэхэр хэбзэ къулыкъухэм зэрифэшъуашэу адэлэжьэнхэмкIэ Общественнэ палатэм мэхьанэшхо зэриIэр.
— Iофыгъо шъхьаIэхэм язэшIо­хынкIэ шъо шъуиеплъыкIэхэр къыдэтэлъытэх. Адыгеим щыпсэухэ-
рэм зишIуагъэ якIыщт унашъохэр тызэгъусэу зэдэтэштэх, — ­къыIуагъ ащ.
Устэ Руслъан икIыгъэ илъэсым зэфэ­хьысыжь къыфишIызэ, Iофыгъо анахь шъхьаIэу агъэцэкIагъэхэм къащыуцугъ. Ахэр республикэм щыпсэухэрэм ящы­IэкIэ-псэукIэ нахьышIу шIыгъэныр, гъэцэ­кIэкIо хэбзэ къулыкъухэм лъэпкъ проектхэр зэрагъэцакIэрэм лъыплъэгъэныр, мысатыу организациехэм социальнэ грантхэр къыдахынхэмкIэ IэпыIэгъу афэхъугъэныр, хэбзэгъэуцу IофшIэным хэлэжьэгъэнхэр, нэмыкIхэри. Пшъэрылъхэр зэрифэшъуашэу щыIэныгъэм щыпхырыщыгъэнхэм фэшI хэбзэгъэуцу ыкIи гъэцэкIэкIо къулыкъухэр къыхагъэла­жьэхэзэ пленарнэ зэхэсыгъохэр, Iэнэ хъураехэр мымакIэу зэхащагъэх.

— Адыгеим и Общественнэ палатэ хэтхэм пшъэрылъэу яIэр шъо­лъырым хэхъоныгъэу ышIыхэрэм защагъэгъозэныр, нэужым а къэбарыр цIыфхэм аIэ­кIэгъэхьэгъэныр, республикэм щыIэ­кIэ-псэукIэу илъыр нахьышIу шIыгъэным яIахьышIу хашIыхьаныр ары, — къыIуагъ Устэ Руслъан.
Ащ къызэриIуагъэмкIэ, АдыгеимкIэ 2024-рэ илъэсэу икIыгъэр мэхьанэшхо зиIэ хъугъэ-шIагъэхэмкIэ баигъэ. Рес­пуб­ликэм иэкономикэ хэхъоныгъэхэр ышIынхэм пащэхэм, хэбзэ къулыкъухэм яIахьышхо хашIыхьагъ. Анахьэу УФ-м и Президент ихэдзынхэу 2024-рэ илъэсым гъэтхапэм и 15 — 17-м щыIагъэхэм общественнэ лъыплъэныгъэр щытхъу хэлъэу зэращызэхащагъэр къыхигъэ-­
щыгъ. Хэдзынхэр зэIухыгъэу, хабзэгъэу­цугъэм диштэу республикэм зэрэ­щы­кIуагъэхэр къыIуагъ. ЛъыплъакIохэм ягъэхьазырын Общественнэ палатэм иIахьышIу хилъхьагъ.
ИкIыгъэ илъэсым ашIагъэм Устэ Руслъан къытегущыIэзэ, ныбжьыкIэ дзэ-­патриотическэ движением хэхъоныгъэ ышIыным, медицинэ ыкIи коммунальнэ фэIо-фашIэхэр зэрифэшъуашэу цIыфхэм афагъэцэкIэным, общественнэ мэхьанэ зиIэ Iофтхьабзэхэр зэхэщэгъэнхэм мэхьанэшхо яIэу къыгъэнэфагъ. Грантхэм якъыдэхынкIэ мысатыу организациехэм IэпыIэгъу афэхъугъэным анаIэ зэрэтырагъэтырэр къыхигъэщыгъ. БлэкIыгъэ илъэсым мы зэнэкъокъум мысатыу ор­ганизацие 50 хэлэжьагъ, сомэ миллион 44-м ехъу зытефэгъэ грантхэр къыда­хыгъ, ащ щыщэу сомэ миллион 30-р рес­публикэ бюджетым имылъку къыхэ­хыгъ. 2024-рэ илъэсыр Унагъом и ­Илъэсыгъ, ащ епхыгъэ Iофтхьэбзэ гъэ­нэфагъэхэм ахэлэжьагъэх. Джащ фэдэу Общественнэ палатэм хэтхэм онлайн шIыкIэм тет зэхэсыгъо 80 рагъэкIо­кIыгъ, общественнэ уплъэкIунхэм къадыхэлъытэгъэ федеральнэ хэбзэгъэу­цугъэ 23-мэ япроектхэм ахэплъагъэх. Урысыем и Общественнэ палатэ къикIыгъэ тхыгъэхэм ыкIи унашъохэм язэхэфын (пстэумкIи 523-рэ фэдиз) Iоф адашIагъ.
Шъугу къэдгъэкIыжьын 2024-рэ илъэ­сым щылэ мазэм Общественнэ палатэм хэтыщтхэр кIэу зэрэхадзыжьыгъэхэр. Мы организацием иIофшIэн хэхьэ пленарнэ зэхэсыгъохэр, Iэнэ хъураехэр зэхэщэгъэнхэр. Обществэр анахьэу зы­гъэгумэкIырэ Iофыгъохэм пленарнэ зэ­хэсыгъохэм ащытегущыIэх.
Джащ фэдэу общественнэ структурэ зэфэшъхьафхэм адэлэжьэгъэнымкIэ зэ­зэгъыныгъэхэм язэдыкIэтхэн епхыгъэ Iофыгъохэм палатэм и Совет щыхэплъа­гъэх, федеральнэ хэбзэгъэуцугъэхэм япроектхэм ягъэцэкIэн тегущыIагъэх.
— Общественнэ лъыплъэным шIуагъэ къытэу зэхэщэгъэнымкIэ мэхьанэшхо зиIэ лъэныкъохэм ащыщ федеральнэ ыкIи республикэ гъэцэкIэкIо къулыкъухэм адэжь щызэхащэгъэ общественнэ советхэм яIофшIэн тыхэлэжьэныр. АР-м и Общественнэ палатэ иаппарат щытхъу хэлъэу ыкIи шIуагъэ къы­тэу Iоф ышIагъ, — къыIуагъ Устэ Руслъан.
2025-р — Хэгъэгум иухъумакIо и Илъэсэу Урысыем щагъэнэфагъ. Мы лъэныкъом палатэм мэхьанэшхо ри­тыщт. Социальнэ мэхьанэ зиIэ пшъэрылъхэр зэшIохыгъэнхэм ынаIэ тыригъэтыщт. Джащ фэдэу Хэгъэгу зэошхом ТекIо­ныгъэ къызыщыдахыгъэр мыгъэ илъэс 80, АР-м и Конституцие заштагъэр илъэс 30 зэрэхъухэрэм яхэгъэунэфыкIын епхыгъэ планэу аштагъэм тегущыIагъэх.
Зэхэсыгъом къыщыгущыIагъэх Мэщ­бэшIэ Исхьакъ, УФ-м народнэ гъэсэ­ныгъэмкIэ ыкIи шIэныгъэмкIэ иIофышIэ­хэм япрофсоюз организацие и Адыгэ рес­публикэ къутамэ ипащэу Жэдэ Зурыет, общественнэ движениеу «Адыгэ Хасэ — Черкес парламент» зыфиIорэм итхьа­матэу ЛIымыщэкъо Рэмэзан, АР-м ибзылъфыгъэхэм я Союз итхьаматэу Вэрэкъо Хьалимэт, нэмыкIхэри.
КIАРЭ Фатим.