Мэзаем и 12-м Адыгэ Республикэм и Правительствэ и Унэ Урысые обществэу «ШIэныгъэм» и Адыгэ шъолъыр къутамэ и ЛъыплъэкIо совет изэхэсыгъо щыIагъ.

Мы советым итхьаматэу, АР-м и ЛIышъхьэрэ министрэхэм я Кабинетрэ яадминистрацие ипащэу Владимир Свеженец зэхэсыгъом тхьамэтагъор щызэри­хьагъ. Ащ хэлэжьагъэх обществэу «ШIэныгъэм» Къыблэ Федеральнэ шъолъырым хэхъоныгъэ щегъэ­шIыгъэнымкIэ гъэIорышIапIэм ипащэу Александр Шматько, мы обществэм ишъолъыр къутамэ итхьаматэу, МКъТУ-м иректорэу Къуижъ Саидэ.
УФ-м и Президентэу Владимир Путиным тапэкIэ къызэрэхигъэщыгъагъэмкIэ, обществэу «ШIэныгъэм» лъэгэпIакIэм тетэу иIоф­шIэн непэ егъэпсы, «пIэлъэ кIэкIым къыкIоцI экспертхэр, просветительхэр зыхэт купышхо зэхищэн ылъэкIыгъ, ахэм яIахьы­шхо хашIыхьэ просветительскэ IофшIэным. Ащ къикIырэр тикъэ­ралыгъо инаучнэ-технологическэ суверенитет нахь пытэ зэрэхъу­рэр ары».
«Урысые обществэу «ШIэныгъэм» и Адыгэ шъолъыр къутамэ 2024-рэ илъэсым Iофэу ышIагъэм къытегущыIагъ къутамэм ипащэу Галина Измайловар. НыбжьыкIэмэ ядэлэжьэн епхыгъэ проектэу агъэцакIэхэрэм ягугъу ащ къышIыгъ.
Мы обществэм ишъолъыр къу­тамэ итхьаматэу Къуижъ Саидэ 2025-рэ илъэсым Iофэу ышIэщтэу агъэнафэхэрэм къатегущыIагъ.
Владимир Свеженец обществэу «ШIэныгъэм» и Адыгэ шъолъыр къутамэ илекторхэм «тхьашъуегъэпсэу» ариIуагъ, ахэм чанэу Iоф зэрашIэрэм къыкIигъэ­тхъыгъ.
— Зыпашъхьэ шъукъыщыгущыIэгъэ коллективхэм яеплъыкIэхэр зэ­хэсэхых. Общественнэ-политическэ Iофхэм алъэныкъокIэ непэ зигъо темэ шъхьаIэхэм шъуа­къытегущыIэ. Мыщ дэжьым шъолъыр ыкIи федеральнэ хэбзэ къулыкъухэм яIофшIэни игугъу къэшъошIы. УФ-м и Президент. министрэхэм я Кабинет яIофшIэн мэхьанэу иIэр икъу фэдизэу цIыфхэм алъышъогъэIэсы. А къэбархэр зэхэугуфыкIыгъэх, зытетым тетэу къэIожьыгъэх, пстэуми анахь шъхьаIэр — цIыфхэм къагурыIонэу гъэпсыгъэх. ЦIыфхэм зэпхыныгъэ къыддыряI, ашIогъэшIэгъоныр зэхэтэхы. ЕтIани, шъолъырым иобщественнэ- политическэ зытет, хэхъоныгъэу ышIыхэрэр ащ къе­гъэлъагъо, — къыIуагъ Владимир Свеженец.
2025-рэ илъэсым Iофэу ашIэщтым, джыри нахь зегъэушъомбгъугъэнымкIэ игъоу ылъэгъу­хэрэр ащ къыIотагъ.
Шъугу къэдгъэкIыжьын, блэкIыгъэ илъэсым гъэсэныгъэм епхыгъэ Iофтхьэбзэ 500 фэдиз шъо­лъырым щызэхащагъ, ахэм нэбгырэ мин 11,5-рэ ахэлэжьагъ.
Обществэу «ШIэныгъэм» и Адыгэ республикэ къутамэ илъэс пчъагъэрэ Ацумыжъ Казбек ипэщагъ. СССР-м илъэхъан обществэр зэрэзэхащэгъагъэр, тишъо­лъыр къызэрэщызэIуахыгъэр, гъогоу къыкIугъэр, хэхъоныгъэу ышIыгъэхэр къэзэрэугъоигъэхэм ащ къафиIотагъ.
Джащ фэдэу зэIукIэм къыщыгущыIагъэх Урысыем и ЛIыхъу­жъэу Цэй Эдуард, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэ­бар жъугъэм иамалхэмкIэ и Комитет итхьаматэу Шъхьэлэхъо Аскэр.
2024-рэ илъэсым Iофэу ашIагъэм икIэуххэм къапкъырыкIыхэзэ, республикэмкIэ лектор анахь дэгъухэм ыкIи ащ фэдэ пшъэ­рылъхэр чIыпIэхэм ащызыгъэцакIэхэрэм АР-м и ЛIышъхьэ и Рэзэныгъэ ыкIи щытхъу тхылъхэмкIэ хагъэунэфыкIыгъэх.
АР-м и ЛIышъхьэ и Рэзэныгъэ тхылъ афагъэшъошагъ Цундышкэ Вячеслав Юрэ ыкъом, МКъТУ-м къэбар щынэгъончъэнымкIэ ыкIи бгъэфедэн плъэкIырэ информатикэмкIэ икафедрэ ипащэ, техническэ шIэныгъэхэмкIэ кандидатым, доцентым; Малышева Елена Михаил ыпхъум, тарихъ шIэныгъэхэмкIэ докторым, АКъУ-м ипрофессор; Рогов Александр Александр ыкъом, Мые­къопэ къэзэкъ обществэм иатаман игуадзэ.
Урысые обществэу «ШIэны­гъэм» ипащэу М.А. Древаль и Рэзэныгъэ тхылъ къаратыгъ Старков Николай Николай ыкъом, техническэ шIэныгъэхэмкIэ кандидатым, МКъТУ-м икафедрэ идоцент; Барцо Сарэ Хьамедэ ыпхъум, Тэхъутэмыкъое рай­онымкIэ поселкэу Яблоновскэм игурыт еджапIэу N 28-м ипащэ Жадэ Зуриет Анзаур ыпхъум, политическэ шIэныгъэхэмкIэ докторым, АКъУ-м ипрофессор; Лаушэ Светланэ, философие шIэныгъэхэмкIэ докторым, АКъУ-м ипрофессор ыкIи нэмыкI­хэми.
Лъэпшъыкъо
Фатим.