Адыгеим и ЛIышъхьэу КъумпIыл Мурат Адыгэ къэралыгъо университетым иректорэу Мамый Даутэрэ физикэ-хьисап шIэныгъэхэмкIэ кандидатэу, зэлъашIэрэ проектэу «Математические этюды» зыфиIорэр зэхэзыгъэуцуагъэу Николай Андреевымрэ зэIу­кIэгъу адыриIагъ.

Ар зыфэгъэхьыгъагъэр сэ­наущыгъэ зыхэлъ ныбжьыкIэхэм хэхъоныгъэ ашIыным ыкIи ахэм IэпыIэгъу ятыгъэным иIофыгъохэр ары.
Николай Андреевыр шIэныгъэхэмкIэ Урысые академием и Математическэ институтэу В. А. Стекловым ыцIэ­кIэ щытым илабораторие ипащ, шIэныгъэмрэ инновациехэмрэкIэ 2010-рэ илъэсым шIэныгъэлэжь ныбжьыкIэхэм азыфагу щыкIогъэ зэнэкъо­къум икIэуххэм ялъытыгъэу УФ-м и Президент ишIухьафтын къыфагъэшъошагъ, ­Адыгэ къэралыгъо университетым Кавказ шIэныгъэ-гъэсэныгъэ хьисап гупчэу иIэм ушэтынхэмкIэ ыкIи гъэсэныгъэ программэхэмкIэ иотдел ина­учнэ IофышIэ шъхьаI. Мы аужырэ илъэси 10-м Николай Андреевым мультимедийнэ хьисап этюдхэр бэу ыугъоигъэх — хьисапыр узыIэпызыщэн, нэб­гырэ пэпчъ къыгурыIон ылъэкIыщт шIэныгъэу зэ-
рэщытыр къизыIотыкIырэ фильм ыкIи миниатюрэ пшIы пчъагъэ ахэр мэхъух.
АР-м и ЛIышъхьэ и УказкIэ Николай Андреевым щытхъуцIэу «Адыгэ Рес­публикэм апшъэрэ еджа­пIэмкIэ изаслуженнэ IофышI» зы­фиIорэр мэфэ заулэкIэ узэкIэIэбэжьмэ фагъэшъо­шагъ. ШIэныгъэ-егъэджэн IофшIэнымкIэ, IэпэIэсэныгъэ ин зиIэ IофышIэхэм ягъэхьазырынкIэ гъэхъагъэу иIэхэм апае а цIэ лъапIэр къыфаусыгъ. ЗэIукIэгъум илъэхъан КъумпIыл Мурат шIэныгъэлэжьым июбилееу блэкIы-
гъэм фэшI фэгушIуагъ рес­публикэм ихэхъоныгъэкIэ ащ Iофэу зэшIуихырэм мэхьанэшхо зэриIэр къыхигъэщыгъ.

Николай Андреевым къы­Iуагъ иIофшIагъэхэм осэшхо къызэрафишIыгъэм ыкIи шIэныгъэ-­ушэтын, гъэсэныгъэ IофшIэнымкIэ республикэм амал дэгъухэр зэращыригъэгъотыхэрэм апае Адыгеим и ЛIышъхьэ зэрэфэразэр. ШIэныгъэлэжьым къызэриIуагъэмкIэ, пэрыт гъэсэныгъэ программэхэр пхырыщыгъэнхэмкIэ, инновационнэ техно­логиехэр гъэфедэгъэнхэмкIэ, шIэ­ныгъэ форумхэр, зэIукIэгъу­хэр ыкIи нэмыкI Iофтхьабзэхэр зэхэщэгъэнхэмкIэ Адыгеир хэгъэгум ичIыпIэхэу анахь зэлъа­шIэ хъугъэхэм ахэуцуагъ.
Адыгэ къэралыгъо университетым иректорэу Мамый Даутэ къыIотагъ джырэ шIэныгъэм хэгъэхъогъэнымкIэ зигъо Iо­фыгъоу къэуцухэрэм япхыгъэ проектыкIэхэм, Адыгэ къэра­лыгъо университетыр къызызэIуахыгъэр илъэс 85-рэ зэрэ­хъурэм, хэгъэгум иухъумакIо и Илъэс къадыхэлъытагъэу зэ­шIуахын фаехэм афэгъэхьыгъэу. Ащ дакIоу къыхигъэщыгъ Адыге­им гъэсэныгъэмрэ ушэтынымрэ алъэныкъокIэ Iофэу щызэшIуа­хыхэрэм хэгъэгум ишIэныгъэлэжь пэрытхэр чанэу къахэгъэ­лэжьэгъэнхэ зэрэфаер.
Адыгеим и ЛIышъхьэ тапэкIи аIэ зэкIэдзагъэу Iоф зэрэзэ­да­шIэщтым мэхьанэшхо зэриIэр къыхигъэщыгъ, сэнаущыгъэ зы­хэлъ ныбжьыкIэхэм апае проектыкIэхэмрэ программэхэмрэ адыригъэштэным зэрэфэхьа­зырыр къыIуагъ.
«Республикэ естественнэ-­хьисап еджапIэр къэзыуххэрэм гъэхъэгъэшIухэр зэрашIыхэрэм мэхьанэшхо иI. Хэгъэгум ипэрыт университетхэм тиныбжьыкIэхэм ащыщхэр мымакIэу ачIэ­хьэх. Еджэныр къызаухыкIэ, нэбгырэ пэпчъ Адыгеим къыгъэ­зэжьынэу тежэ, тигупсэ респуб­ликэ нахь зэтегъэпсыхьагъэ хъуным хэлэжьэнхэу, экономикэм илъэныкъохэм ямыза­къоу, шIэныгъэр джыри нахь лъыгъэкIотэгъэным яIахь ха­шIыхьанэу тащэгугъы», — къы­Iуагъ АР-м и ЛIышъхьэ.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.