Адыгеим и ЛIышъхьэу КъумпIыл Мурат те­атрэмрэ киномрэ яактер цIэрыIоу, Урысыем­рэ Адыгеимрэ янароднэ артистэу, Абхъазымрэ Пшызэ шъолъырымрэ язаслуженнэ артистэу Кукэнэ Мурат ыныбжь илъэс 75-рэ зэрэхъугъэмкIэ фэгушIуагъ.

ЦIыфхэм лъэшэу агу рихьырэ спектаклэу «Псэлъыхъохэр» къызыщагъэлъэгъогъэ, актерыр къызыхъугъэ мафэр, мэзаем и 12-р, ары юбилярым зыфэгу­шIуагъэхэр. Драматургэу Ма-
мый Ерэджыбэ ипьесэ техыгъэ спек­таклэм хэт Хьачик ироль Кукэнэ Мурат илъэс 25-рэ хъу­гъэу къешIы.
КъумпIыл Мурат ишIуфэс псалъэ къыщыхигъэщыгъ Мурат Рэщыдэ ыкъом зэчыишхо зэри­Iэр, IэпэIэсэныгъэшхо зэрэ­хэ­лъыр, ахэм яшIуагъэкIэ къепэсыгъэ лъытэныгъэ къызфа­ри­гъэшIын, Адыгеим итеатральнэ искусствэ иIахьышхо хи­шIы­хьан, республикэм имызакъоу, нэ­мыкI чIыпIэхэми ащыпсэурэ нэбгырэ мин пчъагъэмэ агу ыщэфын зэрилъэкIыгъэр. Рес­пуб­ликэм и ЛIышъхьэ актер цIэрыIом фэлъэIуагъ тапэкIи итворчествэ гушIуагъо хигъо­тэ­нэу, псауныгъэ пытэ иIэнэу, игъашIэ кIыхьэ хъунэу, ыкIуа­чIэрэ игухахъорэ къакIимы­чынэу.
Кукэнэ Мурат къуаджэу Тэ­хъу­тэмыкъуае къыщыхъугъ. 1972-рэ илъэсым Адыгэ къэралыгъо кIэлэегъэджэ институтым филологиемкIэ ифакультет къыу­хыгъ. ТеатрэмкIэ, музыкэмкIэ ыкIи кинематографиемкIэ Ленинград дэт къэралыгъо институтыр къыухыгъ. 1976-рэ илъэсым щегъэжьагъэу Адыгэ Рес­публикэм и Лъэпкъ театрэу И. Шъ. Цэим ыцIэ зыхьырэм Iоф щешIэ. А уахътэм къыкIоцI роль 300-м ехъу театрэм къыщишIыгъ, художественнэ фильм заулэмэ, адыгабзэкIи, урысы­бзэкIи зэхащэгъэ телевизионнэ проектхэм ахэлэжьагъ. 2006-рэ илъэсым къыщегъэжьагъэу 2017-рэ илъэсым нэс Лъэпкъ театрэм ирежиссер шъхьаIэу щытыгъ.
Гъогогъу 500-м ехъурэ къагъэлъэгъогъэ спектаклэу «Псэлъыхъохэр» цIыфхэм зэрягу­нэсыгъэу непи къэнэжьы. Ащ иге­рой шъхьаIэхэм ярольхэр актер цIэрыIохэу Кукэнэ Мурат, Кушъу Светланэ, Зыхьэхэу Заурбыйрэ Мэлайчэтрэ ыкIи нэмыкIхэм къызэрашIыхэрэр лъэ­шэу агу рехьы.
Актерым итворчествэ шIу зы­лъэгъухэрэм мы мафэм амал яIагъ якIэсэ комедием джыри зэ еплъынхэу, актерхэм IэпэIэ­сэныгъэшхо ахэлъэу ярольхэр къызэрашIырэр, имэфэкI ехъу­лIэу Кукэнэ Мурат шIухьафтынэу фашIыгъэр алъэгъунэу. Артист ныбжьыкIэхэу Хьакъуй Анзаур, Ацумыжъ Рустам, Болэкъо Ами­нэт ыкIи нэмыкIхэм нахьыжъхэм рагъэжьэгъэ спектаклыр лъагъэкIотагъ.
Адыгеим и ЛIышъхьэ спек­таклым ыуж Кукэнэ Мурат ыныбжь илъэс 75-рэ зэрэхъугъэмкIэ фэгушIуагъ, псауныгъэ пытэ иIэнэу, исэнэхьаткIи, театральнэ искусствэмкIи лъэгэпIакIэхэм анэсынэу фэлъэ­Iуагъ.
«НахьышIум ренэу щыгугъыныр, ыгуи ыпси етыгъэу Iоф ышIэныр, исэнэхьаткIэ шIэныгъэ куу иIэныр, цIыфхэр шIу ылъэгъунхэр зэчыишхо зиIэ актерым инэшанэх. Мурат Рэщыдэ ­ыкъор ащ фэдэ шапхъэхэм икъоу ади­штэу сэлъытэ. Лъэпкъ театрэм иактер ныбжьыкIэхэр тиюбиляр икIэн зэрэфэсакъыщтхэм, къызэ­раухъумэщтым, ясэнэхьат зэрэ­фэшъыпкъэщтхэм, цIыфхэм агу къызэращэфыщтым сицыхьэ телъ», — къыIуагъ КъумпIыл Мурат.