Хэгъэгу зэошхом илъэхъан советскэ цIыфхэм ар аушэтыгъ. Пыир уичIыгу, уихэгъэгу, уихэку, уикъалэ, уикъуаджэ ащыхъушIэным итхьамыкIагъо зыфэдагъэр зэо-тарихъ тхыгъэхэм ащы­гъэунэфыгъ.

Илъэси 4-м кIогъэ зэошхом имашIо зэхишIагъ Адыгэ хэкуми, нэмыц-фашистхэр тиадыгэ шъо­лъыр мэзихэ щыхъушIагъэх.

ТехакIохэр Адыгеим зырафыжьыгъэхэр мэзаем и 18-р ары. Мы хъугъэ-шIэгъэ иным фэгъэ­хьыгъэ Iофтхьабзэхэр респуб­ликэм зэфэдэкIэ щызэхащэх, ти­тарихъ тэрэзэу хэти зэрэрагъэ­шIэщтым ахэр тегъэпсыхьагъэх.
АР-м и Лъэпкъ тхылъеджапIэ мыщ фэгъэхьыгъэ Iофтхьабзэ мэзаем и 13-м щызэхащагъ. Ащ къырагъэблэгъэгъагъэх дзэкъу­лыкъушIэхэр, АКъУ-м тарихъымкIэ ифакультет истудентхэр, тхылъеджэхэр.
УиблэкIыгъэ пшIэн зэрэфаем, тиныбжьыкIэхэр патриотхэу пIугъэнхэм, Хэгъэгу зэошхом итарихъ ухъумэгъэным лIыхъужъныгъэм исыхьат афэгъэхьыгъагъ.

Iофтхьабзэм хэлэжьагъ ыкIи къыщыгущыIагъ Адыгеир нэмыц-фашистхэм къаIэпахыжьи, шъхьафит зэрашIыжьыгъэм фэгъэхьыгъэ тхы­лъым иавторэу, АКъУ-м идоцен­тэу, Урысыем изаслуженнэ зе­кIоу, ЮНЕСКО-м и Краснодар край гупчэ хэтэу, АР-м зекIонымкIэ изаслуженнэ IофышIэу И. В. Бормотовыр.
ЛIыхъужъныгъэм исыхьат къы­гъэ­баигъ тхылъ къэгъэлъэгъонэу краеведениемкIэ ыкIи лъэпкъ ли­тературэмкIэ отделым къыщагъэхьазырыгъэу «По страницам боевых сражений» зыфиIорэм. Ар зэо илъэсхэм яхьылIэгъэ тхы­гъэ зэ­фэшъхьафхэмкIэ — ­гъэзет, журнал, художественнэ ыкIи тарихъ-документальнэ тхылъ­хэмкIэ зэлъыпкIэгъагъ. Къэрэмыхъужь ащ фэдэ зао!
Дзэукъожь Нуриет.