Федеральнэ проек­тэу «Iэрыфэгъу къэлэ щыIакIэ гъэ­псыгъэныр» зыфи­Iо­рэм къыдыхэ­лъытагъэу зэтырагъэ­псыхьащт чIыпIэхэм якъыхэхынкIэ он­лайн-шIыкIэм тетэу блэкIыгъэ илъэсым зэхащэгъэгъэ мэ­къэтынхэм текIо­ны­гъэр къащызы­хьы­гъэхэм ащыщ къалэу Мыекъуапэ и Гупчэу Лениным ыцIэ зыхьырэр.

Проектым къызэрэдэлъытагъэм тетэу, мыгъэ ар агъэкIэжьыщт. Мы уахътэм ащ етIупщыгъэу фагъэхьазыры. Фонтанэу Iуахыжьыгъэм ычIыпIэкIэ лъэхъаным диштэу гъэпсыгъэу ашIынэу рагъэжьагъ. Ащ дакIоу плиткэу жъы хъугъэр тырахыжьы, чъыг гъугъэхэр раупкIых.

АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, чъыг ыкIи кондэ 500 кIэу щагъэтIысхьащт, хъэринэхэр, тIысыпIэхэр, къэзыгъэнэфырэ пкъы­гъохэр щагъэуцущтых, архитектурнэ псэолъэ зэфэшъхьафхэмкIэ агъэдэхэщт.
ХЪУТ Нэфсэт.