Адыгеим игъогухэр щынэгъончъэнхэм, Iэры­фэгъоу щытынхэм лъэшэу республикэм ихэ­бзэ къулыкъухэм анаIэ тет. Мары мыгъэ «ЩыIэныгъэм пае инфраструктурэр» зыфиIорэ лъэпкъ проектым къыдыхэлъытагъэу IофшIэнхэр лъагъэкIотэщтых.

Шъолъыр ыкIи муниципальнэ мэхьанэ зиIэ автомобиль гъогухэм ямызакъоу, лъэмыдж­хэм яIыгъыни республикэм щыпы­лъых. Шъугу къэдгъэкIы­жьын, 2022 — 2024-рэ илъэсхэм ащ фэдэ псэолъи 7, метрэ 435-рэ, шапхъэхэм адиштэу ашIыжьыгъ.
Автомобиль гъогухэм я Гъэ­IорышIапIэу «Адыгеяавтодорым» къызэрэщаIуагъэмкIэ, 2025-рэ илъэсым лъэмыджышI­хэм псэолъи 5 республикэм щагъэкIэжьыщт: Кощхьэблэ рай­онымкIэ автомобиль гъогоу «Мые­къуапэ — Джаджэр — Псыбай — Карачаевскэр» зэпызычырэ каналым, Мыекъопэ районымкIэ поселкэу Красно­октябрьскэм икIэу станицэу Дагестанскэм кIорэр зэпызы­чырэ псыхъоу Працюхэ, Красногвардейскэ районымкIэ псы­хъоу Псынэф, Джэджэ районымкIэ станицэу Дондуковскэм екIурэ гъогур зэпызычырэ псы­хъоу Фарзэ, Тэхъутэмыкъое районымкIэ Шапсыгъэ псыIы­гъыпIэм и Яблоновскэ дамбэ зэпызычырэ псыхъоу Чилибий ателъ лъэмыджхэр. ЗэкIэмкIи метри 175-рэ мэхъу, илъэсым ыкIэм нэс псэуалъэхэм ягъэ­кIэжьын аухын гухэлъ яI.
Шъолъыр мэхьанэ зиIэ гъогу­хэм ахэхьэрэ лъэмыджхэр шап­хъэхэм адиштэу зэрашIыжьыщтхэр гъогу инфраструктурэр нахьышIу хъуным, Адыгеим ипсэупIэхэм ямызакъоу, зэгъу­нэгъу шъолъыритIум зэпхыныгъэ зэдыряIэным фэIорышIэщт.