Ростехнадзорым Къыблэ фе­деральнэ шъолъырымкIэ итранспорт гъэIорышIапIэ къэралыгъо автонадзорымкIэ ичIыпIэ отделэу Адыгэ Республикэм щы­Iэм ипащэ игуадзэ Урысыем и Уголовнэ кодекс ия 290-рэ статья ия 5-рэ Iахь ипунктэу «а»-м зигугъу къышIырэ бзэ­джэшIагъэ зэрэзэрихьагъэм (IэнатIэ зыIыгъым къуалъхьэ зэриштагъэм) пае Урысыем и Следственнэ комитет Адыгэ РеспубликэмкIэ иследственнэ гъэIорышIапIэ иотделэу мэхьанэшхо зиIэ Iофхэр зэхэзыфырэм иследовательхэм уголовнэ Iоф къыфызэIуахыгъ.
ЗэрагъэунэфыгъэмкIэ, 2022-рэ илъэсым мэлылъфэгъум и 21-м унэе предпринимателэу машинэшхокIэ хьылъэхэр зезыщэрэм административнэ хэ­бзэукъоныгъэхэмкIэ Урысыем и Кодекс ия 12.21.1-рэ статья ия 10-рэ Iахь зигугъу къышIырэ хэбзэукъоныгъэ зэришIыгъэм­кIэ (шапхъэу щыIэхэм ашъхьэдэкIэу хьылъэ зэрэзэрищагъэмкIэ) административнэ материал фы­зэхагъэуцуагъ. Ащ фэдэ ад­министративнэ хэбзэукъоныгъэ зышIыхэрэм сомэ мини 120-м къыщегъэжьагъэу мини 150-м нэсэу тазыр атыралъхьэ.
Къэралыгъо автонадзорым ичIыпIэ отдел ипащэ игуадзэу административнэ материалхэмкIэ унашъохэр зыштэнэу фитыныгъэ зиIэм а мэфэ шъыпкъэм унэе предпринимателым ри­Iуагъ къуалъхьэу сомэ 70-рэ къызыритыкIэ тазыр рамыгъэтыщтэу. Административнэ пшъэдэкIыжь зэрагъэхьынэу фэмыегъэ унэе предпринимателыр къыраIуа­гъэм къезэгъыгъ ыкIи гуадзэм ибанк счет зыфиIуагъэм фэдиз ахъщэ фыригъэхьагъ.
Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ­рэ Адыгэ Республикэм хэгъэгу кIоцI IофхэмкIэ и Министерствэ экономикэ щынэгъончъагъэмкIэ ыкIи къолъхьэ тын-Iыхыным пэуцужьыгъэнымкIэ и ГъэIоры­шIапIэрэ яIофышIэхэм зэдызэха­щэгъэ уплъэкIунхэм Къэралыгъо автонадзорым Адыгэ Респуб­ликэмкIэ ичIыпIэ отдел ипащэ игуадзэ хабзэр зэриукъуагъэр къагъэлъэгъуагъ.
НэмыкI IэнатIэхэр зыIыгъхэу мы бзэджэшIагъэм хэщэгъэн зылъэкIыщтхэм якъыхэгъэщын следовательхэр ыуж итых. Уголовнэ Iофым изэхэфын джыри макIо.
Урысыем щынэгъончъэнымкIэ и Федеральнэ ­къулыкъу Адыгэ Респуб­ликэмкIэ и ГъэIорышIапIэ ипресс-къулыкъу