Лъэпкъ проектэу «ГъэшIэ кIыхьэр ыкIи чаныр» зыфиIорэм диштэу шъолъыр проектэу «Псауныгъэм икъэухъумэн фэгъэзэгъэ пэублэ къулыкъухэр джырэ лъэхъаным диштэу зэтегъэпсыхьэгъэнхэр» зыцIэм ипхырыщын Адыгеим щылъагъэкIуатэ.

Медицинэ организациехэм яшIын, ягъэцэкIэжьын, оборудо­ванием, транспортым якъэщэфын япхыгъэ Iофтхьэбзэ зэфэшъхьафхэр ащ къыхеубытэх.
Лъэпкъ проектым ишIуагъэкIэ илъэсыр къызихьагъэм щегъэ­жьагъэу республикэм иIэзапIэхэм санитар транспорт 13 аратыгъ. Автомобиль псын­кIэ­хэмкIэ сымаджэхэр медицинэ учреждением нагъэсыщтых, зифэIо-фашIэхэр яунэ исхэу зыфагъэцакIэхэрэм адэжь медицинэ IофышIэхэр ащэщтых, биоматериалхэр лабораториехэм аIэкIагъэхьащтых. Машини 8-р гупчэ район сымэджэщхэм, 5-р — къэлэ IэзапIэхэм япхыгъэщтых.
«Президентэу Владимир ­Путиныр кIэщакIо зэрэфэхъу­гъэм тетэу мы илъэсым щегъэжьагъэу лъэпкъ проек­тыкIэхэм Урысыем щадэлажьэхэ хъугъэ. Джырэ лъэ­хъаным къыгъэуцурэ пшъэрылъхэр гъэ­цэкIэгъэнхэр къыдалъы­тэзэ, ахэм ыпэкIэ зэрыгъуа­зэщтыгъэхэ проектхэм нахь зара­гъэушъомбгъущт. Мыщ дэ­жьым къэIогъэн фае стра­тегическэ гухэлъхэр къызэ­рэ­нэжьыгъэхэр, ахэм ахэхьэх цIыфхэм япсауныгъэ гъэпытэгъэныр, ящыIэкIэ-псэукIэ зы­къегъэIэтыгъэныр, унагъом IэпыIэгъу егъэгъотыгъэныр. ­Лъэпкъ проектхэм къащыдэ­лъытэгъэ Iофтхьабзэхэр и­гъом ыкIи дэгъоу гъэцэкIэ­гъэнхэмкIэ ищыкIэгъэ амалхэр республикэм щызетхьащтых», — къыIуагъ Адыгеим и ЛIы­шъхьэу КъумпIыл Мурат.