Тэхъутэмыкъое райо­ным ит поселкэу Яблоновскэм иадми­нистрацие къызэрэща­IуагъэмкIэ, ащ иурам шъхьаIэхэм ащыщэу Промышленнэм игъогу щыщ, унэу N 18-м къыщежьэу урамэу Теуцожьым ыцIэ зыхьырэм нэс, агъэцэкIэжьыгъ.

Подрядчикым, пшъэдэкIы­жьэу ыхьырэмкIэ гъунэпкъэ гъэнэфагъэ зиIэ обществэу «Дортранссервисым» Iоф­шIэнхэр ыухыгъэх.
Мы псэуалъэм игъэкIэжьын лъэпкъ проектэу «Щы­нэгъончъэ ыкIи шэпхъэшIухэм адиштэрэ гъогухэр» зыфи­Iорэм къыдыхэлъытагъэу икIыгъэ илъэсым ичъэпыогъу мазэ рагъэжьэгъагъ, джы мыгъэ «ЩыIэныгъэм пае инфраструктурэр» зыфиIорэу мы илъэсым атIупщыгъэм диштэу лъагъэкIотагъ.
Зэзэгъыныгъэм зэрэщы­гъэнэфагъэм тетэу, гъогушI­хэм псыр ­зэрылъэдэжьыщтхэр агъэпсыгъ, метри 7-м нэсэу гъогум зырагъэушъомбгъугъ, лъэсрыкIо гъогур агъэкIэ­жьыгъ, къэзыгъэнэфырэ пкъы­гъохэр агъэуцугъэх, асфальтэу телъыр зэблахъугъ, зыщищыкIагъэм тамыгъэхэр щагъэтхъыгъэх. Гъогу Iахьыр пстэумкIи зы километрэрэ метри 100-рэ мэхъу. Iоф­шIэнхэм сомэ миллиони 164-рэ атефагъ.
Псэуалъэу агъэцэкIэжьыгъэм цIыфэу поселкэм дэс­хэмкIэ социальнэ мэхьанэ иI. Сыда пIомэ урамым изы цыпэ псэупIэ районыкIэ къы­щашIы, нэбгырэ 1100-м те­лъытагъэу еджапIэ щагъэуцу, адрэ цыпэм спорткомплекс кIэу къыщызэIуахыщт.
Шъугу къэдгъэкIыжьын, къэлэ гъэпсыкIэ зиIэ поселкэу Яблоновскэм иурамхэу Коммунаровым, Карл Маркс ыцIэ зыхьырэм, Центральнэм, псэупIэ коим хэхьэрэ поселкэу Новэм иурамхэм ащыщ­хэр агъэцэкIэжьыгъэх.