Мы къытэшIэкIыгъэ дунаир — Огуи, чIыгуи, пси, жьи, чъыгхэри, къолэбзыухэри, нэмыкI пстэури — Тхьэм къызфигъэхъугъэу, къыз­фигъэшъошагъэр цIыфыр ары. Ащ пае ар къэдгъэгъунэн ыкIи къэтыухъумэн фае. Мэзым е гъэ­хъунэ уц шхъонтIэ е къэгъэ­гъэ мэIум ядэхагъэ зэ о плъэгъу­гъа? Яжьы къабзэ къыпхигъахъоу зыIупщагъа? Жьыбгъэ макIэм иIушъашъэ уедэIугъа? Псыхъо къаргъом зиплъэгъожьэу къыхэкIыгъа? Ащ ынапцэ щыт чъыг ищыгъэхэр пшъэшъэ дахэхэу къыпщыхъугъа?
Тидунае дахэшъ нэр еплъэкIырэп, ау тщэгъупшэ тыфэсакъыныр а тхьэтыным: тэулъэгу, тэушIои мэз шхъуантIэр; тIэпызыгъэп, тэр-тэрэу шIоир самэу къэтэгъа­нэ. Ар губгъэнба, уегупшысэмэ?! Тэры зиер зэкIэ, адэ, сыд пае тэр-тэрэу тызэгуаора? Темыгупшысэу сырнычыр тэдзы, къы­кIанэмэ — машIо; апч бэшэрэбхэр мэукIорэйхэшъ мэзи, псыIуи, чапи аIулъ. Хэта зилажьэр?! Щэч хэлъэп, цIыф цIыкIур ары.
Къолэбзыуи, хьакIэ-къуакIи, хьацIэ-пIацIи зи ялажьэп, хэти зэрилъэкIэу ышъхьэ фэшIушIэ­жьы.
Ау гъэшIэгъонба! Псэ зыпытхэм анахь Iушэу, анахь лъэшэу алъы­тэгъэ цIыфым — мыцIыфым ер ышIэзэ етэкъу, зыдэщытыгъэм уж къытенэ: машIоу ышIыгъэм джыри Iугъор къыхехы, ышхыгъэм къыпыкIыгъэр зэкIэ мы чIыпIэ ухъурэигъэу зыдэщысыгъэхэм щызэхэт, умышIэрэмэ, цумпахьэ мычыжьэу кIуагъэхэу къагъэзэ­жьыщтым фэд… Ащ зи хъун хэлъэп, лажьи-хьакъи зимыIэ мэзлъэгу дахэри, къушъхьэбг шхъуан­тIэри, псыхъо чэчэлэ псынкIэри зы къурэу къырамыдзэу, тичIыопс дахэ аушIои.
Ар хъунэу щытэп! ЕтIани мы­хъу­щтыр нахьыбэрэмкIэ зышIэхэ­рэр зыныбжь икъугъэхэр ары. Сыд пшIэмэ хъущтыр?! Дунэе шхъуан­тIэм къэблэчъэшхорэ чэу лъагэрэ фэпшIынышъ, дэхьанэу къакIорэр ыпкIэ ытызэ хэмыгъэ­хьащтмэ.
УщыIэныр – тхъагъо, ау узфэсакъыжьын фае, плъапэ зынэсырэр хьалэчэу зэхэмыушIуаеу. ГухэкIми, нахьыбэм шIури ери зэхафырэп. ЕтIани, пкIуачIэ зыхэмылъхьагъэу, осэшIу зылъымытыгъэр къидзэгъуае; мыIуш дэдэмкIэ зэкIэ сэигъэкIи зи арыхэп. Ау тыкъэущыным игъу, щыIэнхэ фаехэба тисабыйхэр?! Пчэ пызыщтэп уишIой IуохыжькIэ. Хэти сыдигъуи тызэплъэкIыжьэу, тыз­фэсакъыжьэу, тичIыопс — тиунэу, тищагоу тлъытэу зедгъасэмэ — тыцIыф ыкIи тыхый.