Пшыс
Зы пщыжъ горэм пхъу дэхэ дэдэ иIагъ. «Шы дэхэ мычъ» зы­фаIорэм фэдэу, уеплъынкIэ дахэу, ау ыIэ зыми емыкIоу шъхьахынэ дэдагъ. ГыкIэни, пщэрыхьани, дэни ылъэкIыщтыгъэп. Бэ ащ псэлъыхъоу къыфакIощтыгъэр, ау изэрэщыт къызашIэкIэ зыIурагъэ­хыжьыщтыгъ.
Аузэ, шъхьэзэкъо-лъэкъуитIоу псэурэ кIэлэжъ тхьамыкIэ горэ пщым ыпхъу псэлъыхъоу къы­фэкIуагъ. «Зыми ымыщэу къэ­нэжьын нахьри нахьышIу» ыгукIэ ыIуи, пщым ипшъашъэ кIалэм ритыгъ.
Пщым ыпхъу къыщи кIалэр къэкIожьыгъ.
— Мыдэ къеплъ узэрэпщэры­хьащтым, — ыIуи, нысакIэр еплъызэ лIыр еуцуалIи пщэрыхьагъэ. ТIысыхи зэдэшхагъэх.
— Джы сэ мэзым сыкIощт, о пщэрыхьэ, сшхыщтыр хьазырэу фабэу сыкъыIугъэкIэжь, — ыIуи, кIалэр мэзым пхъащэ кIуагъэ.
Пчыхьэм кIалэр къызэкIожьым, шъузым зи ымышIагъэу, унэм ышхын имылъэу къычIэкIыгъ. ЛIыр ыIэшъхьэ-лъашъхьэхэр дифыехи пщэрыхьагъэ. ЫшIыгъэр зэкIэ изакъоу ышхыжьыгъ.
КъыкIэлъыкIорэ пчэдыжьми, ащ фэдэу лIыр пщэрыхьи шхэжьыгъэ, шъузыр къеплъэу щысызэ.
— Мы ощыр пштэу пхъэ къэпкъутэу, унэм къипхьажьэу упщэ­рыхьагъэу сыкъэбгъэкIожьымэ, титIуи тытIысынышъ тышхэн, — ыIуи цуитIур кIишIи кIалэр мэкъу­щэ кIуагъэ.
НысакIэр мэлакIэ лIапэ зэ­хъум ощыр ышти пхъэ ыкъутэнэу къи­кIыгъ. Пхъэр фэмыкъутэу дэтызэ, ятэ къыдахьи унэмкIэ зегъазэм еджагъ:
— Унэм уимыхьэу моу къакIуи пхъэр къутэ. Мыхэм Iоф зымы­шIэрэр агъашхэрэп!