Адыгеим и ЛIышъхьэу КъумпIыл Мурат Правительствэм и Унэ зэIукIэгъу щыдыриIагъ IофшIэнымкIэ Къэра­лыгъо инспекцием ипащэу — АР-м IофшIэнымкIэ икъэралыгъо ­инспектор шъхьаIэу Сихъу Русет. Ар зыфэ­гъэхьыгъагъэр 2024-рэ илъэсым къулыкъум Iофэу ышIагъэм икIэуххэр ары. Ащ хэлэжьагъ АР-м иминистрэхэм я Кабинет и Тхьаматэ игуадзэу, финансхэмкIэ министрэу Виктор Орловыр.

ЗэIукIэгъур къызэIуихызэ республикэм и ЛIышъхьэ къы­зэрэхигъэщыгъэмкIэ, цIыф­хэм IофшIэнымкIэ яфитыныгъэхэр къэухъумэгъэнхэр — республикэм ихэбзэ къулыкъухэм яIофшIэн илъэныкъо шъхьаIэхэм ащыщ. А IофшIэныр къулыкъу пстэуми яшIэ зэхэлъэу зэшIохыгъэ мэхъу, лъэныкъуищ комис­сиери: АР-м социальнэ ыкIи IофшIэным епхыгъэ зэфы­щытыкIэхэр тэрэзэу гъэпсыгъэнхэм, лэжьапкIэм итын, IофшIэнымкIэ фитыныгъэхэр амыукъонхэм, джащ фэдэу хэбзэIахьхэмрэ угъоинхэмрэ афэгъэхьыгъэ хэбзэгъэуцу­гъэр гъэцэкIагъэ хъуным яIо­­фыгъохэм афэгъэзагъэхэр ащ хэлажьэх.
«ЛэжьапкIэр игъом ыкIи икъоу ятыгъэныр, цIыфхэр официальнэу IофшIапIэхэм аIугъэхьэгъэнхэр, щынэгъончъэу яIоф агъэцэкIэныр, Iоф­шIэнымкIэ къыдалъытэн фэе шапхъэхэр мыукъогъэнхэр — а зигугъу къэтшIыгъэ Iофыгъо пэпчъ зэрищыкIа­гъэм тетэу тынаIэ тедгъэтын фае. Экономикэм хэхъоныгъэу ышIыщтым имызакъоу, цIыф­хэм япсауныгъэ, унагъо пэпчъ щыIакIэу иIэр зыфэ­дэ­щтыр ахэм ялъытыгъэщт», — къы­Iуагъ АР-м и ЛIышъхьэ.

Адыгэ Республикэм IофшIэнымкIэ и Къэралыгъо инспекцие 2024-рэ илъэсым Iофэу ышIагъэм икIэуххэм язэфэхьысыжь Сихъу Русет щигъэгъозагъэх. Инспекциер цIыфхэм ялъэIу тхылъ 500-м ехъу­мэ ахэплъагъ, нэбгырэ 1300-м ехъу ашъхьэ­кIэ зыгъэгумэкIырэ IофыгъохэмкIэ ригъэблэгъагъ, тхыгъэу ыкIи телефонымкIэ къатыгъэ упчIэ зэфэшъхьаф мини 3,2-м ехъумэ яджэуапхэр аритыжьыгъэх, къэбарлъыгъэIэс амалхэм къэбари 192-рэ фэдиз къыхаригъэутыгъ.
Ащ нэмыкIэу республикэм ипредприя­тиехэр гъогогъу 13-рэ ыуплъэкIугъэх, хэукъоныгъэ 47-рэ къыхигъэщыгъ, ахэм ядэгъэзыжьынкIэ унэшъо 20 ышIыгъ. Административнэ пшъэдэкIыжь арагъэ­хьыгъ IэнатIэ зыIыгъхэм, юридическэ лицэхэм ыкIи унэе предпринимательхэм. Тазырэу сомэ миллиони 2,5-рэ фэдиз къарагъэтыгъ. УплъэкIунхэм ялъытыгъэу IофышIэ 370-мэ яфитыныгъэхэр зыпкъ рагъэуцожьыгъэх.
КъумпIыл Мурат зэIукIэгъум икIэуххэм ателъытагъэу пшъэрылъ афишIыгъ лъэны­къо заулэхэмкIэ IофшIэныр нахь агъэ­лъэшынэу. Ахэм ащыщых лэжьапкIэр игъом арамытэу къызэрэхэкIырэм, «чIаукъощэрэ» лэжьапкIэхэм ятын гъунэ афэшIыгъэныр.
АР-м и ЛIышъхьэ ипресс-
къулыкъу къытырэ къэбархэмкIэ
Тхьаркъохъо Сафыет.