ЯгъэцэкIэжьын лъагъэкIуатэ
Къатыбэу зэтет унэхэр игъэкIотыгъэу гъэцэкIэжьыгъэнхэмкIэ программэм иIофшIэн Адыгеим щылъагъэкIуатэ.
Ащ фэгъэзэгъэ фондым икъутамэ ипащэ иIэнатIэ зыгъэцэкIэрэ Иуаныкъо Бислъан къызэриIуагъэмкIэ, уни 160-рэ мыгъэрэ IофшIэнхэм къахиубытэщт. Ахэр зыщырагъэжьэгъахэхэри щыIэх. ГущыIэм пае, МыекъуапэкIэ къатыбэу зэтет унэхэм лифтхэм язэблэхъун мы мафэхэм ащэкIо. Урамэу Чкаловым ыцIэ зыхьырэм иунэу
N 78-м щылэ мазэм и 13-м къыщегъэжьагъэу хьылъэIэтхэр щагъэкIэжьых. Ащ илифтхэм яIофшIэн пIалъэ ыкIэм фэкIо, илъэс 25-м телъытагъ.
— Илъэс 19-кIэ узэкIэIэбэжьмэ унэм хэт лифтхэм гъэцэкIэжьын цIыкIухэр арашIылIэгъагъэх. Ау ар макIэ, сыда пIомэ унэр зашIыгъэм къыщегъэжьагъэу Iоф зышIэрэ Iахьхэр хьылъэIэтхэм къахэнагъэх. Ащ елъытыгъэу, мыгъэ лифтхэр е къызэтебгъэуцопэнхэ е зэблэпхъунхэ фэягъ, — еIо Иуаныкъо Бислъан.
Джащ фэдэу лифтхэр ащызэблахъух урамхэу Чкаловым ыцIэ зыхьырэм тет унэу N 63-м ыкIи 8 мартым иунэу N 22-м. Ахэм гъэцэкIэжьынхэр гъэтхапэм ыкIэм нэс къащаухыщтых. Урамэу Шоссейнэм тетхэм ащыщым IофшIэнхэр щаублэщтых.
Непэ унэхэм ащагъэуцурэ лифтыкIэхэр джырэ шапхъэхэм адештэх: электроэнергиеу агъэкIодырэр нахь макI, ащ елъытыгъэу фэтэрыбэу зэхэтым щыпсэухэрэм электричествэмкIэ уасэр нахь макIэу къафикIыщт ыкIи ащ дищэен ылъэкIыщтыр нахьыб — килограмм 40-м нэсы. Нэбгырэ пчъагъэкIэ къэплъытэн хъумэ, плIыщтыгъэмэ, джы тфы итIысхьан фит. Ащ дакIоу, макъэу апыIукIырэри нахь макI. ПстэумкIи мы илъэсым лифт 18 Адыгеим щызэблахъущт, ахэм сомэ миллион 40 фэдиз апэIухьащт. Зы хьылъэIэтым ыуасэ сомэ миллиони 2,5-рэ фэдиз.
— БлэкIыгъэ илъэсым къатыбэу зэтет унэхэм ахэт лифт 35-рэ зэблэтхъугъ, мыгъэ — 18. 2014-м къыщегъэжьагъэу хьылъэIэт 200-м нахьыбэ дгъэкIэжьыгъ. ПстэумкIи игъэкIотыгъэ гъэцэкIэжьынхэмкIэ шъолъыр фондым ипрограммэ лифт 580-рэ хэт. Ахэр Мыекъуапэ, псэупIэхэу Яблоновскэм ыкIи Инэм ащэлажьэх, — къыIуагъ Иуаныкъо Бислъан.
КъэIогъэн фае, блэкIыгъэ илъэсым егъэпшагъэмэ, мыгъэрэ игъэкIотыгъэ гъэцэкIэжьынхэм унибгъу фэдизкIэ нахьыбэу къызэлъаубытыщт. Ар зихьатырыр цIыфхэм игъом ахъщэ къызэраугъоирэр ары. ГъэрекIорэ къэгъэлъэгъонхэмкIэ ар процент 99,5-рэ мэхъу.
Анцокъо Ирин.