Мэкъумэщ хъызмэтыр мылъку къэкIуапIэу къыхэзыхыгъэ фермерхэм егъэжьапIэ ашIынэу 2025-рэ илъэсым пстэумкIи ­ сомэ миллион 209,3-рэ Адыгеим щатыщт.

БлэкIыгъэ 2024-м егъэпшагъэмэ, ар процент 70-кIэ нахьыб.
Лъэпкъ проектэу «Бизнес цIыкIур ыкIи гурытыр, предпринимательхэр кIэщакIо зыфэхъугъэхэм япхырыщынкIэ IэпыIэгъу ятыгъэныр» зыфиIорэм игъэцэкIэн пай аштагъэхэм ащыщ къэралыгъо программэу «Агростартапыр». Ащ ишIуагъэкIэ гъэрекIо нэбгырэ 49-мэ IэпыIэгъу агъо­тыгъ. ПстэумкIи аратыгъэр сомэ миллиони 123-рэ.
2025-м «Агростартапым» къыдыхэлъы­тагъэу сомэ миллиони 109,3-рэ атыщт. Ащ нэмыкIэу республикэм социальнэ-экономическэ хэхъоныгъэхэр ышIынхэм фытегъэпсыхьэгъэ унэе программэм ишIуагъэкIэ цумпэ лъэпкъхэм якъэгъэ­кIын зегъэушъомбгъугъэным субсидиеу сомэ миллиони 100 пэIуагъэхьащт.
— Мэкъумэщ продукциеу республикэм къыщыдагъэкIырэм инахьыбэр къэзытIупщырэ хъызмэтшIапIэхэм язегъэушъомбгъун Iоф дэтэшIэ. Ащ пай къэралыгъо IэпыIэгъур къыздэлъытэгъэ федеральнэ программэ зэфэшъхьафхэр пхырытэщых. Мы лъэныкъом фэгъэзэгъэ Минис­терствэм, чIыпIэхэм япащэхэм мэкъумэщ бизнес зэхащэн, ащ ыуж ихьагъэхэм зыхагъэхъон амал зэрэщыIэхэр цIыфхэм икъоу алъыгъэIэсыгъэным нахь чанэу Iоф дашIэнэу пшъэрылъ афэсшIыгъ, — къыхигъэщыгъ АР-м и ЛIышъхьэу КъумпIыл Мурат.