Адыгеим и ЛIышъхьэу КъумпIыл Мурат АР-м и Правительствэ иунэ зэIукIэгъу щыдыриIагъ къэралыгъо статистикэмкIэ Федеральнэ къулыкъум и ГъэIорышIапIэу Краснодар краим ыкIи Адыгэ Республикэм щыIэм ипащэ игуадзэу Куржъо Светланэ.

ЗэдэгущыIэгъур къызэIуихызэ рес­публикэм ипащэ къыхигъэщыгъ гъэ­IорышIэным епхыгъэ унэшъо тэрэзхэр штэгъэнхэмкIэ статистикэ къэбар икъоу шъыпкъэныгъэр зылъапсэм мэхьанэшхо зэриIэр.
«ШъуиIофшIэн амал къеты шъыпкъэныгъэр зылъэпсэ къэ­бархэм атетэу хэбзэ къулыкъухэм республикэм иIоф­хэм язытет тэрэзэу агъэу­нэфынымкIэ, социальнэ-экономикэ хэхъоныгъэу тапэкIэ республикэм ышIыщтыри ихъухьэгъэнымкIэ», — къы­Iуагъ АР-м и ЛIышъхьэ.
Куржъо Светланэ 2024-рэ илъэсымкIэ республикэм статистикэмкIэ иотделхэм Iофэу ашIагъэм изэфэхьысыжь Адыгеим и ЛIышъхьэ щигъэгъозагъ, социальнэ-экономикэ Iофыгъо шъхьа­Iэхэм язэшIохын зэрэкIуагъэр къыгъэ­нэфагъ.
ГъэIорышIапIэм къытыгъэ пчъагъэхэм къызэрагъэлъагъорэмкIэ, Адыгэ Респуб­ликэм аужырэ илъэс 25-м къыкIоцI зэхэубытэгъэ продукциеу къыхьыжьырэм зэрэхахъорэм ипсынкIагъэкIэ хэгъэгум инэмыкI шъолъырхэм апэ ит. Джащ фэдэу 2023-рэ илъэсым егъэпшагъэмэ, 2024-м инвестициеу республикэм къи­хьэрэр хэпшIыкIэу нахьыбэ хъугъэ, сомэ миллиард 43,1-м нэсыгъ (проценти 146,4-рэ), организациехэм продукциеу IуагъэкIыгъэр сомэ миллиард 524-рэ фэдиз (проценти 119,7-рэ), цIыфхэр зычIэсыщт унэу ашIыгъэхэр квадрат метрэ мин 565-м шIокIы, къыдэгъэ­кIыжьыным ииндекс проценти 104,5-м нэсыгъ.
Краснодар краимкIэ ыкIи Адыгэ Рес­публикэмкIэ ГъэIорышIапIэм щыла­жьэхэрэмрэ ащ ипащэхэмрэ Iофэу зэшIуахыгъэм, къулыкъу зэфэшъхьафхэм зэдэлэжьэныгъэ дэгъу зэрадыряIагъэм апае зэрафэразэр КъумпIыл Мурат къыIуагъ. Ащ нэмыкIэу статистикэмкIэ отделым лъыплъэн-ушэтын IофшIэнхэр зэрэзэшIуихыхэрэр, шIушIэ Iофтхьабзэхэм ыкIи республикэм иобщественнэ щыIакIэ зэрахэлажьэхэрэр къыхигъэ­щыгъ.

АР-м и ЛIышъхьэ ипресс- къулыкъу къытырэ къэбархэмкIэ Тхьаркъохъо Сафыет.