Урысыем исурэтышIхэм я Союз хэтэу Сергей Карпенкэм иIофшIагъэхэм якъэгъэлъэгъонэу «Откровение времени» зыфиIорэр Мыекъуапэ къыщызэIуахыгъ. Жанрэ зэфэшъхьафхэм арылъ IофшIэгъэ 30 ащ хэхьагъ. Пхъэм хэзыбзыкIырэ IэпэIасэу Олег Субботиныр сурэтышIым игъусэу къэгъэлъэгъоным хэлэжьагъ.

АР-м и Сурэт къэгъэлъэгъуапIэ щызэхащэгъэ Iофтхьэбзэм икъызэIухын хэлэжьагъэх АР-м культурэмкIэ иминистрэу Аулъэ Юрэ, АР-м и Сурэт къэгъэлъэгъуапIэ ипащэу Бырсыр Абдулахь, Адыгэ Республикэм исурэтышIхэм я Союз итхьаматэу Елена Абакумовар.
Сергей Карпенкэм иIофшIагъэхэм плъышъо зэмышъогъухэр къябэкIэу гъэпсыгъэх. НахьыбэмкIэ ахэр зыфигъэхьыгъэхэр зыщыпсэурэ чIыпIэр, унагъор, къэзыуцухьэрэ дунаир. ИщыIэныгъэ къыхэхыгъэу, игупсэмэ афэгъэ­хьыгъэу, чIыопсым, тарихъым, псэу­шъхьэхэм, цIыфхэм ящыIакIэ, нэмыкI­хэм яхьылIэгъэ сурэтхэр гъэшIэгъонэу гъэпсыгъэх.
— ЩыIэныгъэм иуахътэ шъхьэихыгъэу ухэзыщэрэ къэгъэлъэгъонэу IэпэIэситIум непэ къытфагъэхьазэрыгъэр гъэшIэгъон дэд. Ахэм яIэшIа­гъэхэм тишъолъыр илъэпкъ-шэн хабзэхэр, икультурэ, итарихъ, итхыпхъэхэр ахэолъагъо, — къыIуагъ АР-м культурэмкIэ иминистрэу Аулъэ Юрэ.
— Сергей Карпенкэм иIофшIагъэхэр дахэу, узыIэпащэу зэгъэкIугъэх. Пхъэм жабзэ къыдэзыгъотыгъэ Олег Субботиныр иIофшIагъэхэмкIэ илъэпкъ идэхагъэ къыреIотыкIы. Ар IэшIэхэп, ащыщхэм яшIын охътабэ пэIохьэ, ау ежьым ар шIотхъагъу, гухахъо хегъуатэ,— къы­Iуагъ Адыгеим исурэтышIхэм я Союз итхьаматэу Елена Абакумовам.
— Непэ сиIэшIагъэхэм уасэ къызэрафэшъушIыгъэм сырэгушхо. Ситворчествэ гъунапкъэ имыIэу къысщэхъу. Художественнэ сурэтхэр жанрэ зэфэшъхьафхэм арыслъхьагъэх, уахътэр шъхьэихыгъэу къащызгъэлъэгъуагъ, — къыIуагъ Сергей Карпенкэм.
СурэтышIым иIофшIагъэхэм купкIэу ахэлъыр ныбжьыкIэхэм ашIогъэшIэгъо­ныгъ. Олег Субботиным иIэшIагъэхэми къэгъэлъэгъоныр къагъэбаигъ. IэпэIасэр зыдэлэжьэгъэ пкъыгъо 18-р зэмылIэужы­гъоу гъэпсыгъэх. Ахэр унэгъо хьап-щып зэфэшъхьафых, къошыных, Iанэх, нэмыкIых.
— Сяти сятэжъи пхъэшIэ бэлахьыгъэх, джы ахэм яIоф сэ лъысэгъэкIуатэ. СипщыпIэ (мастерскоир) пхъэупсафэу чIэлъым пэпчъ тарихъ гъэнэфагъэ иI. Пхъэм Iоф дэсшIэныр зэрэсикIасэм шIагъо горэ хэлъэп. Ар лъым хэлъэу сыкъэхъугъэу сэлъытэ. Ижъырэ пхъэ хэбзыкIын шIыкIэр непэ къэсэухъумэ, ау ар лъызыгъэкIотэщт ныбжьыкIэхэри щыIэнхэ фае. Пхъэм дэлэжьэнэу шIоигъоныгъэ зиIэ ныбжьыкIэхэр къесэгъэблагъэх, егъэджэн сыхьатхэр зэхэс­щэнхэм сыфэхьазыр, — къыIуагъ Олег Субботиным.
СурэтышIымрэ IэпэIасэмрэ яIэшIагъэхэр яшIыкIэ-гъэпсыкIэкIэ зэфэ­шъхьафхэми, ясэнэхьат шIулъэгъуныгъэу фыряIэмкIэ зэфэдэх. Дунэе еп­лъыкIэу яIэм искусствэм идунэе хьа­лэ­мэт ухащэ.
Къэгъэлъэгъоныр мэзаем и 27-м нэс зэIухыгъэщт. Искусствэр зышIогъэ­шIэгъонхэр ащ еплъынхэу зэхэщакIохэм рагъэблагъэх.
Лъэпшъыкъо Фатим.