АР-м иминистрэхэм я Кабинет изэхэсыгъо зыщатегущыIэгъэ Iофыгъохэм ащыщ республикэм гъэстыныпхъэ шхъуантIэр аIэкIэгъэхьэгъэным ылъэныкъокIэ иIофхэм язытет. АР-м и ЛIышъхьэу КъумпIыл Мурат пшъэрылъ зэрафишIыгъэм тетэу а Iофтхьабзэр зэрищагъ АР-м иминистрэхэм я Кабинет и Тхьаматэу КIэрэщэ Анзаур.

АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Заур къызэриIуагъэмкIэ, гъэстыныпхъэ шхъуан­тIэм ипрограммэ гъэхъагъэ хэлъэу республикэм гъэцэкIагъэ щэхъу. 2024-рэ илъэсым икIэуххэм нафэ къызэрашIыгъэмкIэ, Урысые Федерацием ишъолъырхэм азыфагу я 10-рэ чIыпIэр республикэм щиубытыгъ программэм игъэцэкIэнкIэ. 2024-рэ илъэсым щылэ мазэм и 1-м ехъулIэу гъэстыныпхъэ шхъуантIэр процент 96,18-у цIыфхэм аIэкIагъэхьагъ, 2025-рэ илъэсым щылэ мазэм и 1-м ехъулIэу процент 96,61-м нагъэсынэу щытыгъ.
Гъэстыныпхъэ шхъуантIэр аIэкIэгъэ­хьэгъэным иплан аухэсыгъ. Мы лъэхъа­ным къызэрэрадзагъэмкIэ, ар аIэкIагъэ­хьанэу лъэIу тхылъ къэзытыгъэхэм япчъагъэ 12231-м нэсыгъ.
Iахьзэхэлъ обществэу «Газпром газораспределение Майкоп» зыфиIорэмрэ пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Газпром Межрегионгазымрэ» ягенеральнэ пащэу ЕкъутэкI Аслъан къызэриIуагъэмкIэ, УФ-м и Президент пшъэрылъэу къыгъэ­уцугъэм игъэцэкIэн зыщыкIорэ лъэхъаным 2025-рэ илъэсым щылэ мазэм ехъулIэу лъэIу тхылъ мин 14-м ехъу къаIэкIэхьагъ, ахэм ащыщэу мин 12,3-м Iоф адашIэ, зэзэгъыныгъэ мин 12-м ехъу зэдашIыгъах, унэгъо мини 10,8-м ехъумэ яхапIэхэм ягъунапкъэ гъэстыныпхъэ шхъуантIэр афыращэлIагъ. Ащ нэмыкIэу хэпIэ мин 15,5-мэ гъэстыныпхъэ шхъуан­тIэр аIэкIэгъэхьэгъэнымкIэ техническэ амал яIэ хъугъэ.
Республикэм и ЛIышъхьэ пшъэрылъ зэрафишIыгъэм ыкIи Адыгэ Республикэм иминистрэхэм я Кабинет иунашъохэм къызэрадалъытэрэм тетэу «социальнэ догазификациекIэ» заджэхэрэм ипрограммэ тетэу гъэстыныпхъэ шхъуантIэр зэ­ра­­щэлIэщтхэу IэпыIэгъу аратыным ифи­тыныгъэ зиIэхэр агъэнэфагъэх. Гъэ­стыныпхъэ шхъуантIэмкIэ ящыкIэгъэщт Iэмэ-псымэхэм якъэщэфынрэ ягъэуцунрэ апэIухьащт ахъщэм изы Iахь куп гъэнэфагъэхэм афалъэгъужьыщт. ФэгъэкIотэныгъэр сомэ мини 100-м шIокIыщтэп.
2024-рэ илъэсым программэм къызэрэдилъытэрэм тетэу зэзэгъыныгъэ 3235-рэ зэдашIыгъ, зэзэгъыныгъэ 3094-мкIэ гъэстыныпхъэ шхъуантIэр яхапIэхэм ягъунапкъэхэм анагъэсыгъ, техническэ амалхэр арагъэгъотыгъэх хэпIэ мини 6-м фэдизмэ. Гъэстыныпхъэ шхъуантIэм ихъытыухэр километрэ 300-м нэсыгъэх, газгощыпIэ шкаф 50-м ехъу агъэуцугъ, цIыф псэупIэхэу ыпэкIэ гъэстыныпхъэ шхъуантIэр зынамыгъэсыгъэхэу 5-мэ ар аIэкIагъэхьагъ.
2024-рэ илъэсым тыгъэгъазэм республикэм и ЛIышъхьэ и УказкIэ зэхэубытэгъэ план-графикэу зэхагъэуцуагъэм тетэу хэпIэ мин 12,2-мэ гъэстыныпхъэ шхъуантIэмкIэ 2028-рэ илъэсым нэс техническэ амалхэр арагъэгъотыщтых.
Урысыем и Президентэу Владимир Путиным унашъоу ышIыгъэм диштэу илъэсэу икIыгъэм къыщыублагъэу программэм зырагъэушъомбгъугъ, чъыгхатэхэм ыкIи мысатыу товариществэхэм гъэстыныпхъэ шхъуантIэр аIэкIэгъэхьэгъэным иамал щыIэ хъугъэ. А графикым къызэрэдилъытэрэмкIэ, Мыекъуапэ, Тэхъутэмыкъое ыкIи Теуцожь районхэм ятовариществэ 23-мэ яхэпIэ 2134-мэ ащ фэдэ амал яIэ хъущт.
АР-м иминистрэхэм я Кабинет и Тхьаматэу КIэрэщэ Анзаур кIэуххэм затегущыIэхэ нэужым пшъэрылъ заулэ афишIыгъ. Ахэр зыфэгъэхьыгъэхэр гъэ­стыныпхъэ шхъуантIэр чъыгхатэхэм ыкIи товариществэхэм, джащ фэдэу социальнэ псэуалъэхэм аIэкIэгъэхьэгъэным иIофыгъохэр ары.
Адыгэ Республикэм и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.