«Адыгеим икIэлэпIу анахь дэгъу» зыфиIорэ зэнэкъокъум имуниципальнэ уцугъо республи­кэм ирайонхэм ыкIи икъалэхэм ащаублагъ.

Мыекъуапэ зэнэкъокъур мэзаем и 3-м къыщегъэжьагъэу и 14-м нэс щыIэнэу агъэнафэ. ГъэрекIо кIэлэцIыкIу IыгъыпIэу N 36-м ипсихологэу Ольга Плохотниковам «Адыгеим икIэ­лэпIу анахь дэгъу» зыфиIорэ цIэр къызэрэфагъэшъошагъэм ишIуагъэкIэ зэнэкъокъур мыщ щэкIо.
КIэлэцIыкIу IыгъыпIэхэм Iоф ащызышIэхэрэм яшIэныгъэхэм ахагъэхъо­ныр, анахь чанхэр къыхэгъэщыгъэнхэр ары пшъэрылъ шъхьаIэу зэхэщакIохэм зыфагъэуцужьырэр.

Мы илъэсым зэнэкъокъум имуниципальнэ уцугъо нэбгырэ 11 хэлажьэ. МэфэкI шIыкIэм тетэу Iофтхьабзэр къы­зызэIуахым ыуж кIэлэпIухэм яшIэныгъэ­хэр къагъэлъэгъонэу аублагъ. Апэрэ уцугъом къыдыхэлъытагъэу ежьхэм афэгъэхьыгъэу къагъэхьазырыгъэ къэгъэлъэгъоным ыуж кIэлэцIыкIу IыгъыпIэм чIэс сабыйхэм егъэджэн цIыкIухэр афызэхащагъэх.
Ольга Плохотниковам Iоф зыщишIэрэ кIэлэцIыкIу IыгъыпIэм зэнэкъокъур зэрэщыкIорэм егъэгушхо. Джы ар осэшIхэм ахэт.
— УишIэныгъэхэр къэбгъэлъэ­гъоныр къины къысшIошIы­щтыгъ, ау уасэ афэпшIыныр нахь хьылъ. Зэнэкъокъум къекIолIа­гъэхэм зэкIэми дэгъоу загъэхьазырыгъ. Анахьэу тызэплъырэр къыхахыгъэ темэр къызэрэзэIуа­хырэр, кIэлэцIыкIу­хэм Iоф зарадашIэрэр, аныбжь елъытыгъэу екIолIакIэу къагъотыхэрэр ары. ПэшIорыгъэшъэу гущыIэгъу сафэхъугъ ыкIи мыгумэкIыхэу яшIэныгъэхэр къагъэлъэгъоныр анахь шъхьаIэу зэрэщытыр ясIуагъ, — еIо 2024-рэ илъэсым ианахь кIэлэпIу дэгъу.
КIэлэпIухэм ащыщхэм яегъэджэн зэрэзэхащэрэр нэрылъэгъу тфэхъугъ. КIэлэцIыкIу IыгъыпIэу N 55-м икIэлэпIоу Ольга Харченкэм кIэлэцIыкIухэм пшысэу ашIэрэмкIэ ахэм яегъэджэн ыублагъ, нэужым «дышъэ IункIыбзэм» лъыхъу­гъэх. Такъикъ тIокIым къыкIоцI хырыхыхьэхэр къаригъэшIагъ, геометрическэ пкъыгъо­хэр зыфэдэхэр къаригъэIуагъ, къаригъэ­лъытагъ, Урысыем икартэ зэхаригъэгъэ­уцуагъ. КIэлэцIыкIухэм ар ашIогъэшIэгъоныгъ.
КIэлэцIыкIу IыгъыпIэу N 22-м икIэлэпIоу Надежда Перевозчиковам зэхищэгъэ егъэджэныр тыкъэзыуцухьэрэ дунаим идэхагъэ фэгъэхьыгъагъ, ар къэуухъумэн зэрэфаер джыри зэ агу къыгъэкIы­жьыгъ, къыщыкIыхэрэр, псэушъхьэхэр къаригъэ­Iуагъэх, сурэтхэр аригъэшIыгъ.
КIэлэцIыкIу IыгъыпIэу N 29-м икIэлэпIоу Олеся Бесединам кIэлэцIыкIухэр зыщыпсэухэрэ республикэм, къалэм фэгъэхьыгъэу кIэлэцIыкIухэм Iоф ади­шIагъ. Республикэм ибыракъ зыфэдэр, мэхьанэу иIэр къаригъэIуагъ, чIыпIэ дахэу Мыекъуапэ иIэхэр сурэтхэм атетэу къыгъэуцугъэх, ахэм акIэрыхьэзэ мэхьанэу яIэр къаригъэIуагъ.
КIэлэпIоу зэнэкъокъум хэлажьэхэрэр гощыгъэхэу мы мафэхэм кIэлэцIыкIухэм Iоф адашIэщт. Мыщ зэрифэшъуашэу зыкъыщызыгъэлъагъохэрэм мастер-класс къатыщт ыкIи яIофшIэн фэгъэхьыгъэ хъугъэ-шIагъэхэм хэкIыпIэу къафагъотыщтхэр къыраIотыкIыщтых. Мэзаем и 14-м Iофтхьабзэр аухыщт, текIоныгъэ къыдэзыхырэм зэнэкъокъум иреспубликэ уцугъо зыфигъэхьазырыщт.

ДЕЛЭКЪО Анет.
Сурэтыр авторым ий.