Лъэпкъ орэдыIо студиеу «Бэрэчэт босын» зыфиIорэм иорэдыIоу, зэримылъэгъурэмкIэ а 1-рэ купым хэхьэрэ сэкъатныгъэ зиIэ Щыщэ Сусаннэ иконцерт Кощхьэблэ районым лъэпкъ культурэмкIэ и Гупчэ щыкIуагъ. ОрэдыIом ыныбжь илъэс 40 зэрэхъурэм ар фэгъэхьыгъагъ.

Кощхьэблэ район администрацием культурэмкIэ и ГъэIорышIапIэ ипащэу Рауф Хурья Iофтхьабзэр къызэIуихыгъ. ГущыIэ фабэхэмкIэ ар Сусаннэ къыфэгушIуагъ, орэдыIом республикэм икультурэ иIахьышIу зэрэхилъхьэрэм фэшI культурэмкIэ Министерствэм и Рэзэныгъэ ыкIи район администрацием и Щытхъу тхылъэу къыфагъэшъошагъэхэр къыритыжьыгъэх. Хьафизэхэм я Урысые обществэ и Адыгэ республикэ организацие ыцIэкIэ Щытхъу тхылърэ нэпэеплъ шIухьафтынрэ ащ итхьаматэу Алексей Хлоповым С. Щыщэм фигъэшъошагъэх. Джащ фэдэу орэдыIом къыфэгушIуагъэ­хэм ащыщ итворческэ гъогу егъэжьапIэ фишIынымкIэ IэпыIэгъу къыфэхъугъэу, АР-м кульутрэмкIэ изаслуженнэ IофышIэу Владимир Хурс.
ЦIыфым июбилей зыхъукIэ блэкIыгъэ илъэсхэм язэфэхьысыжьхэр ышIэнхэр ыкIи къэкIощт уахътэм гухэлъышIухэр зыфигъэуцужьынхэр хабзэ. Зымылъэгъу­рэ пшъашъэм гукIочIэ лъэшэу хэлъым ишIуагъэкIэ къызэрымыкIо щыIэныгъэ ыкIи творческэ гъогу къыкIун ылъэ­кIыгъ. Непэ ащ бзылъфыгъэ насыпышIоу зелъы­тэжьы: сабыитIумэ ян, ицIыкIугъом къыщегъэжьагъэу гухэлъ чыжьэу зыдиIыгъыгъэр – сценэм тетэу орэд къы­Iоныр, музыкэм пылъыныр – ащ къыдэхъугъэх. Сусаннэ илъэс 20 хъугъэу хьафизэхэм азыфагу щызахащэрэ Урысые, шъолъыр фестиваль ыкIи музыкальнэ зэнэкъокъу зэфэшъхьафхэм ахэлажьэ, хагъэунэфыкIырэ чIыпIэхэр къащыдехы. Музыкэм имызакъоу, ар еджэным лъэшэу фэщагъ, Брайль исистемэ дэгъоу ыIэ къыригъэхьагъэу еджа­кIохэм яшъолъыр зэнэкъокъоу 2024-рэ илъэсым зэхащагъэм текIоныгъэр къыщыдихыгъ.
Гухэлъ благъэу Щыщэ Сусаннэ зыдиIыгъыр орэдыкIэхэр тыритхэнхэр, ахэм ягущыIэхэр къыфэзытхырэ Ирина Бондаревам, орэдыIо студиеу «Бэрэчэт босын» зыфиIорэм ядэлэжьэн лъигъэ­кIотэныр ары. Хэгъэгу зэошхом ТекIоныгъэр къызщыдахыгъэр илъэс 80 зэрэхъурэм фэгъэхьыгъэ фестивалэу «Мы-Za талант» зыфиIоу хьафизэхэм я Урысые обществэ ригъэкIокIыщтым ар хэлэжьэщт.
Концертым Сусаннэ иорэдхэу жанрэ зэфэшъхьафхэм арылъхэр щыIугъэх. Джащ фэдэу ащ сценэм къыдытет иIоф­шIэгъухэу Владимр Хурс, Белла Новиковам, Шъхьэумэжъ Аминэт яорэдхэми къэзэрэугъоигъэхэр ядэIунхэ амал яIагъ.
Щыщэ Сусаннэ имэфэкI мафэкIэ тыфэгушIо, ащ фэдэ Iофтхьабзэ зэхэщэгъэным зиIахьышIу хэзышIыхьагъэхэм тафэраз.
Алексей Хлопов.
Хьафизэхэм я Урысые обществэ ичIыпIэ организациеу Мыекъуапэ дэтым итхьамат.