Адыгеим цIыфышъхьэ пчъагъэм щыхэгъэхъогъэным фэIорышIэрэ социальнэ IэпыIэгъоу щыIэхэр нахьыбэ зэрашIыщтым къэралыгъо хабзэм икъулыкъухэр ыуж итых. Ахэм ащыщ 2025-рэ илъэсым щылэ мазэм и 1-м къыще­гъэжьагъэу зэтыгъо ахъщэ тынэу сабый ежэрэ бзылъфыгъэу мафэрэ еджэхэрэм афагъэнэфагъэр.

АР-м IофшIэнымкIэ ыкIи социальнэ хэхъоныгъэмкIэ и Министерствэ сабыйхэм, бзылъфыгъэхэм ыкIи унагъом яIофхэмкIэ иотдел ипащэу Саида Стрикачевам къызэриIуагъэмкIэ, зызэпкъаджэр мэфи 180-м нахь мымакIэу республикэм имедицинэ организацие иучет хэуцогъэ бзылъфыгъэм ыкIи а пIалъэм мэзих нахьыбэ темышIагъэмэ, ахъщэ IэпыIэгъур тефэ, ащ дакIоу, очнэ шIыкIэм тетэу ар зыщеджэрэ апшъэрэ гъэсэныгъэ организациер Адыгеим итын фае.
— НэмыкI социальнэ IэпыIэгъоу къатефэхэрэм ямылъытыгъэу, мы ахъщэ тыныр сабый ежэрэ бзылъфыгъэхэм къаратыщт. Федеральнэ проектэу «Унэгъо Iужъу» зыфиIорэм хэхьэрэ лъэпкъ проектэу «Унагъом» мыр къыдыхэлъытагъ. Ащ пэIухьащт мылъкур федеральнэ ыкIи шъолъыр бюджетхэм къарыкIыщт, — хигъэунэ­фыкIыгъ Саида Стрикачевам.
Зэтыгъо ахъщэ тыныр къышъуатынымкIэ зызфэжъугъэзэщтыр: IофшIэнымкIэ ыкIи цIыфхэр социальнэу къэухъумэгъэнхэмкIэ Зэхэубытэгъэ Гупчэр (шъузщыпсэурэм елъытыгъэу) ыкIи МФЦ-р. IофшIэгъу мэфи 10-м къыкIоцI лъэIу тхылъым хэплъэх, ма­зэм и 26-м нэс ахъщэ тыныр зытефэрэм фатIупщы.
2025-рэ илъэсым щылэ мазэ и 1-м къыщегъэжьагъэу 2027-рэ илъэсым тыгъэгъазэм и 31-м нэс хэбзэгъэуцугъэм кIуачIэ иI.
Iэшъынэ Сусан.