«Мыекъуапэ ишэн-хабзэхэр» зыфиIорэ проектэу республикэ гран­тым иIэпыIэгъукIэ блэкIыгъэ илъэсым шъолъырым щагъэцэкIагъэр «Серебряный лучник-Юг» зыцIэ Лъэпкъ тыным изэнэкъокъу икIэух едзыгъо хэфагъ.

Проектым иIэшъхьэтет мысатыу зэхахьэу «Дом Шварца» ипащэу Надежда Суховаяр. ПстэумкIи Къыблэ ыкIи Темыр Кавказым ишъолъыр 11-мэ яIофшIэгъэ 86-рэ зэнэкъокъум хэлэжьагъ.

«Мыекъуапэ ишэн-хабзэхэр» зыфиIорэ проектыр Мыекъуапэ итарихъ-культурнэ кIэн изэгъэшIэнрэ ар цIыфхэм ашIогъэшIэгъон шIыгъэнымрэ атегъэ­псы­хьагъ. Пшъэрылъ шъхьаIэр — я 19-рэ лIэшIэгъум ыкIэм, я 20-м иублэгъум къалэм культурнэ, экономическэ щыIакIэу дэлъыгъэр, а лъэхъаным ишэн-ха­бзэхэр лIэужыкIэхэм ягъэшIэгъэныр ары. Проектым къызэрэщыдэлъытагъэу, унэгъо фестивалэу «Мыекъуапэ ишэн-ха­бзэхэр» зыфиIорэр рекIокIыгъ. Ащ хэлэжьагъэхэм революцием ыпэкIэ Мыекъуапэ зыфэдагъэм нэIуасэ зыфашIыгъ. А пстэур драматургэу ыкIи пшысэтхэу Евгений Шварц иIэпэрытххэмкIэ зэтырагъэуцожьыгъ. Ащ фэ­шъхьафэу, зекIо лъэгъуакIэхэу лъэсэу къызыщыпкIухьащтхэр Мыекъуапэ щагъэпсыгъэх, къэгъэлъэгъонхэр рекIокIыгъэх. Нэбгырэ 1300-рэ фэдиз ахэм ахэлэжьагъ.
Анцокъо Ирин.