Хьыкум приставхэм я Федеральнэ къулыкъу Адыгэ РеспубликэмкIэ и ГъэIорышIапIэ иколлегие игъэкIотыгъэ зэхэсыгъоу иIагъэм 2024-рэ илъэсым Iофэу ышIагъэм изэфэхьысыжьхэм ыкIи тызхэт илъэсым пшъэ­рылъэу зыфигъэуцужьхэрэм щатегущыIагъэх.

ГъэIорышIапIэм ипащэу, рес­пуб­ликэм ихьыкум пристав шъхьа­Iэу Александр Ихно къызэри­IуагъэмкIэ, федеральнэ къулы­къум къыгъэнэфэгъэ пшъэрылъхэм ягъэцэкIэнкIэ, шIуагъэ къытэу IофшIэныр зэхэщэгъэнымкIэ къэ­гъэлъэгъонышIухэр яIэх. 2024-рэ илъэсым анахьэу анаIэ зытырагъэтыгъэр кIэлэпIупкIэм итын, джащ фэдэу кIэлэцIыкIу ибэхэм, ны-тыхэр зышъхьащымытхэм псэупIэхэр ягъэгъоты­гъэнхэм яIо­­фыгъохэр ары. Зыныбжь имыкъугъэхэм яфитыныгъэхэр къау­хъумэзэ, ахэм сомэ миллион 245-рэ афызэкIагъэ­кIожьыгъ, ыпэрэ илъэсым мыщ фэдэ ­иуахътэ егъэпшагъэмэ, ар процент 31-кIэ нахьыб.
2024-рэ илъэсым изэфэхьысыжьхэм къызэрагъэлъагъорэмкIэ, цIыфхэм нахь ящыкIэгъэ къэралыгъо фэIо-фашIэхэр зэри­фэшъуашэу афэгъэцэкIэгъэнхэм къулыкъушIэхэм анаIэ тырагъэтыгъ.
Хэбзэгъэуцугъэм диштэу пшъэ­рылъхэр гъэцэкIэгъэнхэр Iофыгъо шъхьаIэхэм ащыщэу ГъэIорышIапIэм ипащэ къыIуагъ. Ащ дакIоу 2025-рэ илъэсым анахьэу анаIэ зытырагъэтыщт лъэ­ныкъо­хэр къыгъэнэфагъэх.
Зэхэсыгъом икIэухым илъэсым изэфэхьысыжьхэм къа­дыхэлъытагъэу зипшъэрылъхэр шIуагъэ къытэу зыгъэцэкIэгъэ структурнэ подразделениехэр тынхэмкIэ къыхагъэщыгъэх.
Анахь дэгъоу мызыгъэгум агъэ­нэфагъэр хьыкум приставхэм я Федеральнэ къулыкъу икъутамэу Красногвардейскэ районым щыIэр ары.
Хьыкум приставхэм
я Федеральнэ къулыкъу
АдыгеимкIэ и ГъэIорышIапIэ ипресс-къулыкъу.