Республикэм ихэхъоныгъэкIэ мэхьанэшхо иI

Адыгеим и ЛIышъхьэу КъумпIыл Мурат АР-м и Правительствэ зычIэт унэм зэIукIэгъу щыдыриIагъ Iахьзэхэлъ обществэу «Россети Кубань» зыфиIорэм ипэщакIэу Алексей Рыбиным. Республикэм иэнергетическэ комплекс ихэхъоныгъэ иIофыгъохэм ахэр атегущыIагъэх.
Ащ хэлэжьагъэх АР-м иминистрэхэм я Кабинет и Тхьаматэу КIэрэщэ Анзауррэ ащ игуадзэу ЛIыхэсэ Махьмудрэ, АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Заур, Iахьзэхэлъ обществэу «Россети Кубань» зыфиIорэм икъутамэу Адыгэ электрическэ сетьхэм япащэу Дмитрий Рязанцевыр, «Россети Кубань» илIыкIохэр.

Адыгеим и ЛIышъхьэ Алексей Рыбиным IэнэтIакIэм зэрэIухьагъэм пае фэгушIуагъ ыкIи ыпэкIэ ащ пэщэныгъэ дызезыхьэщтыгъэ Борис Эбзеевым Iофэу ышIагъэм шIуагъэ къытэу зэрэщытыгъэр къыхигъэщыгъ. Джы Б. Эбзеевым Iахьзэхэлъ обществэу «Россети Центр» зыфиIорэм пэщэныгъэ дызэрехьэ. КъумпIыл Мурат къыхигъэщыгъ Россетьхэм адэлэжьэгъэным ыкIи тапэкIи ащкIэ гъэхъэгъэшIухэр шIыгъэнхэм мэхьанэшхо зэриIэр, сыда пIомэ республикэр энергием зэрэщыфыкIэрэм нахь къыкIегъэчыгъэнымкIэ Iофтхьабзэхэу зэшIуахыхэрэм джыри нахь ахэгъэхъогъэн фаеу пшъэрылъ къэуцу.
«БэшIагъэ шIуагъэ къытэу Россетьхэм тызадэлажьэрэр. Борис Эбзеевым пэщэныгъэ ащ дызэрихьэ зэхъум республикэм къыIэкIэхьэрэ энергием хэгъэхъогъэным пае бэ зэшIотхын тлъэкIыгъэр. Ащ амал къытыгъ республикэм ихэхъоныгъэкIэ итхъухьагъэхэр гъэхъагъэ хэлъэу зэшIохыгъэ хъунхэу. Инвестициехэр нахьыбэ зэрэхъугъэхэм имызакъоу, илъэсэу икIыгъэм икIэуххэмкIэ рейтингым къызэригъэлъэгъуагъэмкIэ, цIыфхэм ящыIакIэ нахьышIу зэрэхъугъэм елъытыгъэу я 16-рэ чIыпIэм тынэсыгъ. Ау ащ дакIоуи, Россетьхэм зэдэлэжьэныгъэу адытиIэм джыри нахь зедгъэушъомбгъун зэрэфаем къыпкъырыкIырэ пшъэрылъ заулэ дгъэцэкIэнэу къытпыщылъ. Ахэм ащыщых электричествэ рыкIуапIэхэм ыкIи хъытыухэм ягъэцэкIэжьын гурытымкIэ уахътэу ыхьырэм къыкIегъэчыгъэныр ыкIи нэмыкI Iофыгъохэр. Iахьзэхэлъ обществэу «Россети Кубань» тапэкIи чанэу тыдэлэжьэным тыщэгугъы, итхъухьагъэхэр зэшIотхынхэмкIэ амалхэри щыIэх», — къыIуагъ КъумпIыл Мурат.
Iахьзэхэлъ обществэу «Россети Кубань» ипащэ къызэрэхигъэщыгъэмкIэ, республикэм инвестициехэмкIэ гухэлъэу иIэхэр икъоу зэшIохыгъэ хъунхэм компанием ынаIэ тыригъэтыщт ыкIи зэкIэми зэдытие пшъэрылъхэр гъэцэкIагъэ хъунхэм пае Адыгеим ихэбзэ къулыкъухэм нахь шIуагъэ къытэу тадэлэжьэн фае.
Адыгеим а лъэныкъомкIэ нахь хэхъоныгъэ ышIыным иIофыгъохэм затегущыIэхэ нэуж къызэрэхагъэщыгъэмкIэ, киловатт 35-рэ кIуачIэ зиIэ подстанцие 59-мэ непэ республикэм Iоф щашIэ. Энергием икъэкIуапIэхэм тызэращыкIэрэр идгъэкъужьы-ным пае IофшIэн гъэнэфагъэ зэшIотэхы.
ГущыIэм пае, илъэсэу икIыгъэм компаниеу «Россети Кубань» зыфиIорэм ихъытыухэм псэолъэ зэфэшъхьафэу мини 3-м ехъу апытшIэн тлъэкIыгъ. Ахэр цIыфхэр зыщыпсэухэрэ унэхэм ямызакъоу, псауныгъэм икъэухъумэн, гъэсэныгъэм, культурэм ыкIи нэмыкI псэолъэ инхэм япхыгъэу щытых.
Зэзэгъыныгъэу зэдэлэжьэныгъэм ылъэныкъокIэ 2023-рэ илъэсым зэдашIыгъагъэм тегъэпсыхьагъэу компаниеу «Россети Кубань» зыфиIорэм республикэм игупчэ зэфэшъхьафхэу энергием икъэкIуапIэхэр зищыкIагъэхэм афэдэу 9 зэтыригъэпсыхьажьыгъ. Ахэр: «Черемушкэр», «Адыгейскэр», «Севернэр», «Инэм», «Кужорскэр», «Тульскэр» ыкIи нэмыкIхэр. Джащ фэдэу икIыгъэ илъэсым «ИКЕА-м» иподстанцие зэтырагъэпсыхьажьыгъ, ащ амал къытыгъ индустриальнэ паркэу «Инэм» технологие лъэныкъомкIэ шIуагъэ къыфэзыхьыщт Iофтхьабзэхэр зэшIохыгъэнхэу.
ЗыгъэпсэфыпIэу «Лэгъонакъэ» иэнергосетьхэм джыри нахь хэхъоныгъэ ягъэшIыгъэным тегъэпсыхьэгъэ пшъэрылъхэу зэшIохыгъэн фаехэр щыIэх. Республикэм зыпкъитыныгъэ хэлъэу тапэкIи ищыкIэгъэ энергиер къыIэкIэхьаным пае Адыгеим иминистрэхэм я Кабинетрэ Iахьзэхэлъ обществэу «Россети Кубань» зыфиIорэмрэ пстэуми апэу зэшIохыгъэн фэе пшъэрылъ заулэ агъэнэфагъ.
ИкIэухым Адыгеим и ЛIышъхьэ анаIэ анахьэу зытыраригъэдзагъэхэм ащыщ республикэм энергиемкIэ щыкIагъэу иIэр игъэкъужьыгъэным пае компаниеу «Россети Кубань» зыфиIорэм лъэныкъо пстэумкIи зэдэлэжьэныгъэу дыряIэм зырагъэушъомбгъуныр, инвестициехэр нахьыбэ хъунхэм тегъэпсыхьэгъэ гухэлъхэу ашIыгъэхэм яIахь нахьыбэу хашIыхьаныр.
«НепэкIэ анахь мэхьанэ зиIэр тизэдэлэжьэныгъэ къыкIетымыгъэчыным имызакъоу, пстэуми апэу зэшIохыгъэн фэе Iофыгъохэм ягъусэу тапэкIи тынаIэ зытетыщтхэр икъоу ихъухьэгъэнхэр ары. Ащ фэдэ IофшIэным ишIогъэшхо къэкIощт республикэм ихэхъоныгъэкIэ анахь мэхьанэ ин зиIэ пшъэрылъхэр зэшIохыгъэнхэмкIэ», — къыIуагъ КъумпIыл Мурат.
АР-м и ЛIышъхьэ ипресс- къулыкъу къытырэ къэбархэмкIэ Тхьаркъохъо Сафыет.