Гъэсэныгъэм итарихъ

Адыгэ кIэлэегъэджэ колледжэу Андырхъое Хъусенэ ыцIэ зыхьырэр илъэси 100 зэрэхъурэм ипэгъокIэу кIэлэегъаджэхэм апае егъэджэн Iофтхьабзэ мы мафэхэм зэхащагъ. Я XIX-рэ лIэшIэгъум иятIонэрэ кIэлъэныкъо ыкIи я XXI-м ипэублэ Адыгеим игъэсэныгъэ, ипросвещение хэхъоныгъэу ашIыгъэхэм ятарихъ ар фэгъэхьыгъагъ.
Iофтхьабзэм къырагъэблэгъагъэх АР-м и Къэралыгъо Совет — Хасэм гъэсэныгъэмкIэ, наукэмкIэ, ныбжьыкIэ IофхэмкIэ, спортымкIэ, къэбар жъугъэм иамалхэмкIэ ыкIи общественнэ организациехэм зэпхыныгъэ адиIэгъэнымкIэ икомитет ипащэу Шэуджэн Тембот, АР-м гъэсэныгъэмрэ шIэныгъэмрэкIэ и Министерствэ илIыкIоу Афэунэ Рэмэзан, гурыт сэнэхьат зыщарагъэгъотырэ еджапIэхэм япащэхэр, кIэлэегъаджэхэр, кIэлэпIухэр.
Iофтхьабзэр къызэIуихыгъ колледжым ипащэу Къэгъэзэжь Мурат. Сыд фэдэ лъэхъани тарихъым мэхьанэ ин зэриIэр ащ къыхигъэщыгъ. Гъэсэныгъэм исистемэ илъэныкъо зэфэшъхьафхэм, гъэсэныгъэм иучреждениехэм къакIугъэ гъогум зэратегущыIэщтхэр, илъэс зэкIэлъыкIохэм кIэлэегъаджэу Iоф зышIагъэхэм къагъэнэгъэ кIэным ягугъу зэрашIыщтыр ащ къыхигъэщыгъ.
— 2005-рэ илъэсым къыщегъэжьагъэу гъэсэныгъэм иучреждение зэфэшъхьафхэм Iоф ащызышIэхэрэм яшIэныгъэхэм ахэгъэхъогъэным фэшI мы Iофтхьабзэр зэхэтэщэ. ЯIофшIэнкIэ хэхъоныгъэхэр языгъэшIыщт лъэныкъохэр зэхахых, опытэу аIэкIэлъымкIэ зэхъожьых, лъэныкъо зэфэшъхьафхэмкIэ гумэкIыгъоу щыIэхэм атегущыIэх, ахэм язэшIохынкIэ шIэгъэн фаехэр агъэнафэх. Мы илъэсым тиколледж загъэпсыгъэр илъэси 100 зэрэхъурэр къыдэтлъытэзэ, гъэсэныгъэм тарихъэу къыкIугъэм анахьэу тынаIэ нахь тедгъэтыгъ, — къыIуагъ Къэгъэзэжь Мурат.
КIэлэегъэджэ шIэныгъэхэмкIэ докторэу, Адыгэ къэралыгъо университетым ипрофессорэу Шорэ Ибрахьимэ къызыхъугъэр гъэрекIо илъэси 100 зэрэхъугъэр колледжым ипащэ къыхигъэщыгъ. Ащ иIофшIэн лъэпкъ кIэн хъугъэ ыкIи къыткIэхъухьэрэ лIэужхэм адыгэ шэн-хабзэхэр ягъэшIэгъэнхэмкIэ непэ къызнэсыгъэми итхылъхэр агъэфедэх. Адыгэ этнопедагогикэм изэгъэшIэн иIахьышIу ащ зэрэхэлъыр къыхигъэщыгъ.

— Республикэм гъэсэныгъэмкIэ исистемэ хэхъоныгъэхэр ышIынхэмкIэ мы Iофтхьабзэм мэхьанэшхо иI. КIэлэегъэджэ колледжыр къызызэIуахыгъэр илъэси 100 зэрэхъурэм ипэгъокIэу щыт. Гурыт сэнэхьат гъэсэныгъэ языгъэгъотырэ апэрэ еджапI. Мы илъэсхэм къакIоцI гурыт ыкIи апшъэрэ еджапIэхэм, сэнэхьат зыщарагъэгъотыхэрэм, кIэлэцIыкIу IыгъыпIэхэм щытхъу хэлъэу Iоф ащызышIэрэ нэбгыришъэ пчъагъэ колледжым къычIигъэкIыгъ. Республикэм имызакъоу нэмыкI чIыпIабэмэ ящытхъу арагъаIозэ ахэм Iоф ащашIагъ, непи арэущтэу щыт. Шъхьафэу къыхэгъэщыгъэн фае къэралыгъом итарихъ хэхьагъэхэу, СССР-м и ЛIыхъужъхэр мыщ зэрэщеджагъэхэр. Ахэм ащыщ колледжым ыцIэ зыхьырэ Андырхъое Хъусен, — къыIуагъ Шэуджэн Тембот.
Я XIX-рэ лIэшIэгъум икIэухым ыкIи я XXI-м ипэублэ гъэсэныгъэм исистемэ республикэм зэрэщагъэпсыгъэм ыкIи ащ хэхъоныгъэу ышIыгъэхэм, а лъэныкъом НэмытIэкъо Юсыф иIахьышIоу хэлъым афэгъэхьыгъэу докладхэр къашIыгъэх.
Нэужым купищэу гощыгъэхэу къэзэрэугъоигъэхэм IофшIэныр лъагъэкIотагъ. Гурыт сэнэхьат зыщарагъэгъотыхэрэм, кIэлэцIыкIу IыгъыпIэхэм ыкIи гурыт еджапIэхэм Iоф ащызышIэхэрэм яшIэныгъэхэм ахагъэхъуагъ.
ДЕЛЭКЪО Анет.
Сурэтхэр: Адыгэ кIэлэегъэджэ колледж.