Урысыем икинематографистхэм я Союз икъута­мэу АР-м щыIэр кIэщакIо зыфэхъугъэ я V-рэ зэнэ­къо­къу-кинофестивалэу «Адыгеир, шIу усэлъэгъу!» зыфиIорэр мэзаем и 1-м аублагъ. Адыгэ Респуб­ликэм и ЛIышъхьэу КъумпIыл Мурат, АР-м культурэмкIэ и Министерствэ, къулыкъу ыкIи общественнэ организацие зэфэ­шъхьафхэр иIэпыIэгъухэу Iофтхьабзэр зэхащагъ.

УФ-м икинематографистхэм я Союз икъутамэу АР-м щыIэм ипащэу Нэгъэплъэ Аскэрбый кинофестивалым изэхэщэн кIэщакIо фэхъугъ.
Пшъэрылъ шъхьаIэу зэнэкъокъум иIэр режиссермэ ясэнаущыгъэ къы­хэгъэщыгъэныр, яIоф фэгъэчэфыгъэн­хэр, джащ фэдэу ныбжьыкIэмэ гъэхъа­гъэхэр ашIынхэмкIэ IэпыIэгъу афэхъу­гъэныр ары.

Зэнэкъокъум хэлажьэхэрэм лъэныкъуищкIэ заушэтыщт: анимационнэ, документальнэ ыкIи джэгукIэ шIыкIэм тет кинор.
— Я V-рэ зэнэкъокъу-кинофестивалэу «Адыгеир, шIу усэлъэгъу!» зыфиIорэм иIофшIэн ыублагъ. Адыгеим икинематографистхэм я Союз кIэщакIо зыфэхъугъэ зэнэкъокъум илъэс къэс нахь зетэгъэушъомбгъу. Республикэр дунаим нахь щашIэным Iофтхьабзэр фэIорышIэ. ТапэкIэ шъо­лъыр фестивалыр дунэе мэхьанэ зиIэ Iофтхьабзэ тшIы тшIоигъу. Зэнэкъо­къум игъунапкъэхэм нахь зядгъэушъом­бгъущт, — къыIуагъ Нэгъэплъэ Ас­кэрбый.
Шъолъырхэм кинотворчествэр къа­щыIэтыгъэн фаеу Нэгъэплъэ Аскэрбый елъытэ. Адыгеим щыщ ныбжьыкIэхэр зэнэкъокъум хэлэжьэнхэу зэхэщакIо­хэм рагъэблагъэх.
ЗэхэщакIохэм къызэраIуагъэмкIэ, осэшI купым IофшIэгъэ анахь дэгъу­хэр къыхигъэщыщт. 2025-рэ илъэсым чъэ­пыогъум и 7-м Iофтхьабзэр зэфа­шIыжьыщт.
Лъэпшъыкъо Фатим.