ГъэпсэфыпIэм изэтегъэпсыхьан лъагъэкIуатэ
Зигугъу тшIырэр Адыгэкъалэ ипроспектэу Лениным ыцIэ зыхьырэм щагъэпсырэ паркыр ары.
«ПсэупIэр ыкIи къэлэ щыIакIэр» зыфиIорэ лъэпкъ проектым къыдыхэлъытагъэу Урысыем икъэлэ цIыкIухэр илъэс заулэкIэ узэкIэIэбэжьмэ зызэрагъэнэкъокъухэм Адыгэкъалэ текIоныгъэр къыдихыгъ. Ащ ишIуагъэкIэ мы общественнэ чIыпIэм игъэпсын пае федеральнэ Гупчэм ахъщэ къетIупщышъ, чэзыу-чэзыоу паркым ишIын лъагъэкIуатэ.
Проектым къыдэлъытагъэу чIыпIэу зэлъиубытырэм зырагъэушъомбгъу, тIысыпIэхэр, къэзыгъэнэфырэ пкъыгъо дахэхэр щагъэуцугъэх, кIэлэцIыкIухэм апае джэгупIэхэр щашIыгъэх, лъэсрыкIо гъогухэр плиткэкIэ апкIыхьагъэх, псэушъхьэхэм атехыгъэ пкъыгъо гъэшIэгъонхэр дагъэуцуагъэх.
АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, Адыгэкъалэ ипарк ипроект иящэнэрэ чэзыу къыдыхэлъытэгъэ IофшIэнхэр илъэсэу къихьагъэм лъагъэкIотэщтых.
ХЪУТ Нэфсэт.
Сурэтыр: Адыгакъэлэ иадминистраций.