Камери 120-рэ агъэуцущт
Аппаратнэ-программнэ комплексэу «Щынэгъончъэ къалэр» зыфиIорэм къыдыхэлъытагъэу ахэр Адыгеим щагъэуцущтых.
Непэрэ мафэм ехъулIэу тишъолъыр камерэ 648-рэ щэлажьэ, ахэр гъогурыкIоным ишапхъэхэр амыукъонхэм ыкIи урамхэр щынэгъончъэнхэм фэIорышIэх. Шъолъырым комплекси 177-рэ щыгъэпсыгъ, хьылъэзещэ машинэхэм афытегъэпсыхьэгъэ автоматическэ щэчэлъи 6-мэ Iоф ашIэ. ИкIыгъэ илъэсым ичъэпыогъу мазэ къыщыублагъэу мобильнэ аппаратнэ-программнэ комплексэу «Тайфун» зыфиIорэм фэдэу тIу щыIэ хъугъэ, шапхъэхэр зыукъорэ автомобильхэр ахэм агъэунэфы.
Аппаратнэ-программнэ комплексэу «Щынэгъончъэ къалэр» зыфиIорэр гъэкIэжьыгъэным, зэпыугъо имыIэу ошIэ-дэмышIэ Iофхэр цIыфхэм алъызгъэIэсыщт гупчэ мэкъэгъэIу системэм Iоф ышIэным, «системэу 112-р» нахь зэтегъэпсыхьэгъэным апае а номерым гъогогъу мин 394-рэ гъэрекIо цIыфхэр теуагъэх, Адыгеим и ЛIышъхьэу КъумпIыл Мурат пшъэрылъ заулэ афишIыгъ.
«Мы зигугъу тшIыгъэмэ шIокI имыIэу Iоф ашIэн фае. Граждан ухъумэным исистемэ шэпхъэшIухэм адиштэу дгъэпсыныр тикъэралыгъо и Президент къыгъэнэфэрэ пшъэрылъхэм ащыщ. Тизыпкъитыныгъэ ошIэ-дэмышIэу зэщыкъомэ, шIуагъэ къытэу ыкIи тэрэзэу тызекIоным тыфэхьазырын фае. Ащ фэдэ ухьазырыныгъэм мафи чэщи иIэп, къэбгъэуцу хъущтэп», — къыIуагъ КъумпIыл Мурат.