Сомэ миллион 54,3-кIэ нахьыбэу
Президентым и Фонд къыхэхыгъэ грантхэм апэIуагъэхьанэу 2025-рэ илъэсым шъолъырхэм аратыщтыр агъэнэфэгъах.
Адыгеим сомэ миллион 19,3-м ехъу къыфэкIощт. БлэкIыгъэ илъэсым сомэ миллион 14,8-рэ къыратыгъагъ.
Обществэм IэпыIэгъу етыгъэнымкIэ Адыгеим иресурснэ Гупчэ къызэритыгъэмкIэ, сатыу организациеу социальнэ Iофхэм апылъхэм япроекти 4 грант атефэу къыхахыгъ. Ахэм япхырыщын пстэумкIи сомэ миллиони 4-рэ мин 80-рэ тефэщт.
Мы федеральнэ IэпыIэгъум ишIуагъэкIэ гъэпсэфыпIэ Гупчэу «Библиотека Плюс» зыфиIорэм цIыфым иакъыл зыхилъхьэрэ стратегическэ джэгукIэу «Го» зыфиIорэм шъэфэу хэлъхэм афыригъэджэщтых, цIыфэу кIодыгъэхэм алъыхъугъэнымкIэ АР-м и Гупчэ охътабэ темышIэу зыдэщыIэр амышIэрэр къэгъотыжьыгъэным пае шIыкIэу ыгъэфедэхэрэм афигъэсэщтых, дронхэм язэпэгъэчъэнкIэ Федерацием кIэлэцIыкIухэмрэ зихэхъогъухэмрэ мы зэнэкъокъум узэрэхэлэжьэщтыр аригъэшIэщт, мысатыу организациеу «Заповедный Кавказ» зыфиIорэм чIыопс заповедникхэм нэIуасэ афэзышIыщт экскурсоводхэр ыгъэхьазырыщтых.
Адыгеим имысатыу организациеу грантхэр зыгъэфедэхэрэм япчъагъэ илъэс къэс нахьыбэ мэхъу. АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч къызэриIуагъэмкIэ, мыщ фэдэ проектхэм грантэу аратырэр къызхахырэ зэхэт бюджетыр 2025-рэ илъэсым сомэ миллиони 10-кIэ нахьыбэ хъугъэ, сомэ миллион 54,3-м ар нэсыгъ. Ащ щыщэу сомэ миллион 35-р республикэ бюджетым къыхэхыгъ, сомэ миллион 19,3-р Президент грантхэм я Фонд иахъщ.