Санавиацием ишIуагъэкIэ
2024-рэ илъэсым къыкIоцI санавиациер къызфагъэфедэзэ сымэджэщхэм ыкIи IэзапIэхэм IэпыIэгъу зищыкIэгъэ нэбгырэ 58-рэ анагъэсыгъ, ахэм ащыщэу нэбгыриплIыр сабыигъэх.
«ГъэшIэ кIыхьэр ыкIи чаныр» зыфиIорэм къыдыхэлъытагъэу къулыкъум иIофшIэн мыгъи лъегъэкIуатэ.
Медицинэ вертолётыр 2025-рэ илъэсым апэрэу Адыгэ республикэ клиническэ сымэджэщым, ащ къыкIэлъыкIоу Краснодар краим иклиническэ сымэджэщэу N 1-м быбыгъэ. Нэбгырищ ящыIэныгъэ къагъэнэжьыгъ, нэбгыритIумэ шIокI зимыIэ операцие афашIын фэягъ.
— Санавиациер медицинэ IэпыIэгъу псынкIэр зищыкIагъэхэр сымэджэщхэм ыкIи IэзапIэхэм анэгъэсыгъэнхэмкIэ амылышIоу щыт. ЦIыфым апэрэ IэпыIэгъур егъэкIыгъэнымкIэ ищыкIагъэр зэкIэ медицинэ вертолетым илъ. Зэпыугъо ямыIэу врачхэм Iоф ашIэ, макъэ къазэрарагъэIугъэм лъыпытэу чIыпIэу къагъэнэфагъэм быбынхэм фэхьазырых, — къыхигъэщыгъ АР-м и ЛIышъхьэ.