Лъэпкъ проектэу «Унагъом» ипхырыщын пае аштэгъэ федеральнэ проектэу «Унагъом имэхьан ыкIи куль­турэм иинфраструктур» зыфиIорэм ишIуагъэкIэ тхылъеджа­пIэхэм ягъэцэкIэжьын республикэм щылъагъэ­кIотэщт.

2025-рэ илъэсэу къи­хьагъэм тхылъеджэпIитIу ащ къыхиубытэщт.
АгъэкIэжьыщтхэр Красногвардейскэ районымкIэ Еленовскэ къоджэ тхылъеджапIэмрэ Тэ­хъутэмы­къое районым ипоселкэу Яблоновскэм дэтымрэ. Ахэр цIыфэу къякIуалIэ­хэрэмкIэ Iэры­фэ­гъущтых, лъэхъаным ди­штэрэ оборудованиехэмкIэ зэтырагъэпсыхьащтых, ятхылъ фонд агъэ­кIэжьыщт. Мыхэм анэмыкIэу 2025 — 2026-рэ илъэсхэм Адыгэ респуб­ликэ кIэлэцIыкIу тхылъ­еджапIэр зэтырагъэпсы­хьажьыщт.
Шъугу къэдгъэкIыжьын, 2019-рэ илъэсым къы­щегъэжьагъэу 2024-м нэс лъэпкъ проектэу «Культурэм» къыдыхэлъытагъэу Адыгеим модельнэ тхылъеджэпIэ 16 щагъэпсыгъ. Ахэм ащыщэу Майскэм, Улапэ ыкIи Гъобэкъуае адэтхэр блэ­кIыгъэ илъэсыр ары за­гъэкIэжьыгъэхэр.