Хэгъэгу зэошхом ТекIоныгъэр къызщыдахыгъэр илъэс 80 зэрэхъурэм ипэгъокIэу КъокIыпIэм щыпсэурэ лъэпкъхэм яискусствэкIэ Къэралыгъо музеим и Къутамэу Мыекъуапэ дэтым зэхахьэ щыIагъ. Къэгъэлъэгъонэу «УзытемыкIошъущтхэр» зыцIэр къызэIуахыгъ.

Адыгеим, Темыр Кавказым, Урысыем и Къыблэ ясурэтышI 20-мэ яIэшIэгъэ 40 фэдиз къэгъэлъэгъоным хэхьагъ. Искусствэм илъэныкъо зэфэшъхьафхэм ахэр арылъых. IэрышI искусствэм ипкъыгъохэри мыщ щыплъэгъущтых. Ахэм янахьыбэр музеим ифонд щыщых.
Музеим ипащэу ШъэуапцIэкъо Аминэт къэгъэлъэгъоныр къызэIуихыгъ.
— Мыгъэ, Хэгъэгу зэошхор заухыгъэр илъэс 80 зыщыхъурэм, ащ имэхьанэ нахь зыкъеIэты, дзэкIолIхэу, офицерхэу тидунай фашизмэм щызыухъумагъэхэм яшIэжь къызэтедгъэнэным, дгъэлъэпIэным тынаIэ атетэгъэты. Тикъэгъэлъэгъон хэхьэгъэ IофшIагъэ пэпчъ купкI гъэнэфагъэ иI. IэпэIасэхэм яIофшIэн пэпчъ екIолIэкIэ зэфэшъхьаф къызэрэфагъотыгъэм тикъэгъэ­лъэгъон гъэшIэгъон къешIы. Хэгъэгу зэошхом хэкIо­дагъэхэм яшIэжь дгъэлъэпIэныр, зыщыпсэухэрэ чIыпIэм ТекIоныгъэшхом икъыдэхын иIахьэу хилъхьагъэр цIыфхэм ядгъэшIэныр ары пшъэрылъ шъхьаIэу тиIоф­тхьабзэ иIэр. КъыткIэхъухьэрэ лIэужыкIэм тихэгъэгу итарихъ, ихъишъэ ышIэн фае, — къыIуагъ ШъэуапцIэкъо Аминэт.
Зэхахьэм къыщыгущыIагъэх АР-м иветеранхэм я Совет итхьаматэу Къоджэ Аслъан, Дунэе Адыгэ Хасэм и Хэсашъхьэ хэтэу МэщфэшIу Нэдждэт, АР-м культурэмкIэ и Министерствэ иотдел ипащэу Теуцожь Нуриет.
— Типшъэрылъ шъхьаIэр цIыфхэм языкIыныгъэ, язэкъотныгъэ, япсэемыблэжьныгъэ ыкIи IофшIэным зэрэфэщагъэхэм адакIоу, Хэгъэгум шIулъэгъуныгъэшхоу фыряIэм ишIуагъэкIэ шъхьа­фитныгъэр къытфыдэзыхыгъэхэм яшIэжь къызэтед­гъэнэныр, дгъэлъэпIэныр, къыткIэхъухьэхэрэм ядгъэшIэныр ары. Ветеранхэм, апсэ халъхьэзэ тичIыгу гупсэ къэзыухъумагъэхэм, заом ыкIыб щыIэхэу ТекIоныгъэр къэзыгъэблэгъагъэхэм, тишъолъыр, хэгъэгур зэо ужым зыпкъ игъэуцожьыгъэнхэм зиIахь хэзышIыхьагъэхэм яIофшIагъэ зэрифэшъуашэу уасэ фэтшIын фае, — къы­Iуагъ Къоджэ Аслъан.
Хэгъэгу зэошхом илъэхъан тидзэкIолIхэм лIыблэнагъэ зэрахьэзэ псэемыблэжьэу зэуагъэх. Зэо кIыбым щыIэхэр яIэпыIэгъухэу зэкъотхэу мамыр щыIакIэм фэбэнагъэх. Хэгъэгур къэзыухъумагъэ пэпчъ лIыхъужъ. А зэпстэури мы IофшIагъэхэм къыраIотыкIы, заом ихьазаб сурэтхэм ащыолъэгъу. Заом хэтыгъэ сурэтышIхэу Анатолий Сундуковым, Цэй Евгений, Петр Филиппенкэм яIэшIагъэхэри къэгъэлъэгъоным хэхьагъэх. Ахэм чIыпIэ хэхыгъэ аубыты. Джащ фэдэу тилъэ­хъан исурэтышI IэпэIасэхэу Борис Ворониным, Къат Теуцожь, Эдуард Овчаренкэм, Бырсыр Абдулахь, Къуанэ Аслъан ыкIи нэмыкIхэм яIофшIэнхэри мыщ къыщагъэлъагъох.
Хэгъэгу зэошхом илъэхъан Громовым ыцIэ зыхьырэ Мыекъопэ аэроклубыр мы музеир джы зыдэщыт чIыпIэм щылажьэщтыгъ. Ащ фэгъэхьыгъэ тарихъыр къизыIотыкIырэ видео зэхахьэм къыщагъэлъэгъуагъ.
Мы Iофтхьабзэм ныбжьыкIэхэмкIэ мэхьанэшхо иI. Тятэжъ-тянэжъэу заом хэлэжьагъэхэм, хэкIодагъэхэм къинэу алъэгъугъэм, афызэшIокIыгъэм ифэшъошэ уасэ еттыныр зэкIэми типшъэрылъ. КъыткIэхъухьэхэрэм ядгъэшIэн фае Хэгъэгу зэошхом къэралыгъомкIэ мэхьанэу иIагъэр.
Хэгъэгум илIыхъужъхэм яшIэжь мыкIосэным фэIорышIэрэ сурэт къэгъэлъэгъоныр жъоныгъуакIэм ыкIэ нэс зэIухыгъэщт.
Лъэпшъыкъо Фатим.
Сурэтыр авторым тырихыгъ.